As diferentes facetas deste proxecto integrador e transformador teñen tamén por obxectivo utilizar a arte visual, o cinema, a música, a danza, o teatro e as técnicas dramáticas como un instrumento eficaz para a comprensión e a procura de alternativas a problemas sociais e interpersoais derivados da exclusión.

Ao construír unha sociedade aberta en pleno século XXI habemos de satisfacer desde o respecto da diferenza as demandas de todos os sectores sociais, pero en especial as dos grupos marxinados e vulnerables da sociedade.

Recoñecemos por iso as necesidades especiais dos individuos con diversidade de capacidades e as persoas con discapacidades ou con outras capacidades para que atopen neste proxecto un lugar de creación e de convivencia cun programa innovador e contemporáneo como é o proxecto "Encontro Artes pola Integración".

ESPAZOS ABANDONADOS

Continuamos nesta edición co uso de espazos abandonados da cidade para presentar as propostas artísticas, espazos en desuso, apartados ou esquecidos. Unha metáfora ou paralelismo con certas persoas que por ser diferentes sofren o abandono social e precisan ser visibilizadas.