Un total de 42 proxectos optan, unha vez pechado o prazo de solicitude, ás liñas de axuda postas en marcha pola Concellería de Culturas, Deporte e Coñecemento destinadas a apoiar as entidades vinculadas á cultura tradicional, a través do Plan de apoio ás entidades de arraigo, e para organizar as festas de carácter comunitario en colaboración coas entidades veciñais, dentro da liña Facemos comunidade. A área de Culturas do Concello promove, nalgúns casos a través do Instituto Municipal Coruña Espectáculos (IMCE), un total de cinco convocatorias en réxime de concorrencia competitiva ás que destina 620.000 euros co obxectivo de apoiar a creación e a diversidade cultural da cidade, tanto para entidades, salas e asociacións veciñais. A Concellería de Culturas mantén aberto o prazo de solicitude para outras dúas liñas de axudas: Cultura de Barrio, ata o 7 de maio, destinada a entidades e colectivos que contribúan á descentralización da programación cultural en favor dos barrios, e o Plan de Apoio á Creatividade Grupo Xerminal, que se pode solicitar tamén ata o 15 de maio e busca alimentar a produción en diversas disciplinas relacionadas coa palabra, o son, a plástica, a escena, a imaxe e outras manifestacións artísticas. Unha quinta liña, Cultura de proximidade, destinada a salas de música e artes escénicas, abrirá a súa convocatoria unha vez se publique no Boletín Oficial da provincia.

Tal e como explicou o titular da área de Culturas, José Manuel Sande, o goberno local busca, por medio destas convocatorias, artelladas nun sistema de concorrencia competitiva, "organizar e regular as relacións entre a administración local e os colectivos, de maneira que quede asegurada a igualdade de oportunidades a través da valoración dos proxectos". A Concellería de Culturas, fai notar, aposta por "arraigar e fortalecer o sistema cultural da cidade e a todos os seus axentes de maneira que non sexa o Concello o que centralice e monopolice as manifestacións artísticas da cidade". "Cremos que isto redunda nunha maior diversidade e enriquecemento do panorama cultural da Coruña", indica Sande.

A convocatoria do Plan de Arraigo, á que se destinan 100.000 euros, está dirixida ás entidades vinculadas á cultura tradicional, incluídas aquelas que, fóra do ámbito máis profesional, teñen unha grande significación para a cidade pola súa tradición e traxectoria. Facemos Comunidade, pola súa banda, conta cunha dotación de 250.000 euros para apoiar e regular a organización das festas dos barrios xunto con entidades veciñais. Como recalca o concelleiro de Culturas, permanecen abertos os prazos de solicitude das outras dúas liñas de axudas. Cultura de Barrio, dotada de até 100.000 euros, está dirixida ao tecido creativo e aos colectivos informais que traballan dende os barrios en accións de carácter socio-comunitario, e  Grupo Xerminal, á que se destinan 120.000 euros, para estimular a creación de proxectos de intervención artística "vinculados á vangarda e á creación contemporánea, para expandir os límites da creación". Finalmente, o departamento inviste 50.000 euros na liña Cultura de Proximidade para apoiar ás salas de artes escénicas e musicais "que desenvolven un importante labor na programación cultural da cidade".

Toda a información sobre estas cinco convocatorias pódese consultar a través da páxina web municipal www.coruna.gal/cultura.