Este xoves 19, a Banda Municipal de Música da Coruña (BMMC) achegarase á historia da música da cidade a través dun concerto especial que terá lugar no Teatro Colón ás 20.00 horas, dando continuidade ao programa de actos culturais impulsado polo Concello co gallo do Día das Letras Galegas.

O pontevedrés Juan Lois Diéguez (Agolada, 1980), formado nos conservatorios de Lalín, Santiago de Compostela e Vigo, será o director convidado que levará a batuta en 'Paseo con aires ártabros', un espectáculo de recuperación histórica artellado a modo de viaxe pola Coruña dos séculos XIX e XX.

Este percorrido da man da Banda Municipal de Música da Coruña achégase a figuras senlleiras na historia musical da cidade. De Pascual Veiga a José Castro 'Chané', pasando por Ricardo Courtier, o concerto previsto para mañá abrangue sete pezas que revivirán os ambientes sonoros da Coruña nun período de efervescencia artística no que os orfeóns, o teatro, as bandas de música e os certames concentraban o talento, creatividade e ideas de compositores coruñeses que, como Courtier, apostaban por unha evolución da música galega sen perder de vista a tradición.

O concerto 'Paseo con aires ártabros', que comezará este xoves ás 20.00 horas, será de acceso libre ata completar capacidade. Ademais, emitirase tamén en directo, a través de YouTube, unha modalidade posta en marcha este mes que fai simultáneo o formato presencial e dixital ampliando o seu público, que poderá acceder ao concerto desde outros lugares para deleitarse coa música da Banda Municipal da cidade.