O Concello, a través do IMCE, abre mañá o prazo de inscrición para participar como figurante na Cabalgata de Reis 2020 que se celebra coma sempre o 5 de xaneiro. O período de inscrición comezará o venres 13 de decembro de 2019 ás 14.00 ata o martes 17 de decembro de 2019 ás 14:00 h e se poderá prolongar en días sucesivos, en caso necesario, ata que se esgoten as prazas.

Poderanse inscribir todos os nenos e nenas que na data do 1 de xaneiro de 2020 teñan unha idade comprendida entre os 7 e os 11 anos (nados en 2008, 2009, 2010, 2011, 2012). A totalidade de prazas ofertadas nesta modalidade é de 251 entre participantes en carrozas e participantes en trenes.

As solicitudes formalizaranse únicamente de forma electrónica a través do formulario de inscrición que se poderá atopar na web municipal www.coruna.es/cultura

A inscrición realizarase por orde correlativa de recepción das solicitudes debidamente cubertas, asignando consecutivamente a cada unha delas o número de solicitude correspondente. Soamente se validará unha única inscrición por nena ou neno. Ademais, para determinar a ubicación dos participantes na cabalgata procederase a realizar un sorteo que do mesmo xeito serviría para adxudicar as prazas no caso de que as solicitudes excedan a oferta de prazas dispoñibles. O sorteo realizarase o 20 de decembro ás 10:00 h na sala de exposicións do Palacio Municipal, adxudicando as prazas correlativamente a partir do número agraciado no sorteo según a seguinte distribución en función das categorías:

- Do 01 ao 90: Carrozas Reis Magos.

- Do 91 ao 132: Carrozas Municipais.

- Do 133 ao 251: Trens Municipais.

Unha vez realizada a adxudicación comunicaráselles aos interesados (vía correo electrónico ou vía telefónica) a súa ubicación na Cabalgata, así como a información necesaria para a participación na mesma: lugar e horario de presentación o día 5 de xaneiro e horario e forma de recollida dos menores na Praza de María Pita, unha vez rematada a Cabalgata e o Saúdo Real. Esta folla de información colgarase tamén na paxina web www.coruna.es como anexo ás bases.