29-05-2023_LISTAXES PROVISIONAIS DE SOLICITANTES

Publícase a listaxe provisional de solicitantes dos Campamentos Deportivos Municipais de Verán 2023:

• Listaxe Provisional de Solicitantes por orde alfabética
• Listaxe Provisional de Solicitantes por orde cronolóxica
• Listaxe Provisional de Solicitantes por DNI de titor/a

Ademais, publícanse as solicitudes descartadas por estaren duplicadas (Punto 8 das Bases da convocatoria)

• Listaxe Provisional de Solicitudes Descartadas por Duplicidade

Alegacións e corrección de erros: establécese un prazo de 2 días naturais, 30 e 31 de maio, para alegacións e corrección de erros, a través do correo electrónico: programasdeportivos@coruna.gal.

O correo electrónico sempre debe envialo o mesmo proxenitor, titor ou titora que fixo a preinscrición e será obrigatorio deixar un teléfono de contacto.

Durante o prazo de emenda de erros non se permitirá o cambio de opcións de campamento nin se aceptarán novas solicitudes. Só se poderán emendar datos persoais consignados no formulario.

QUEN PODE SOLICITALOS​?

Nenos e nenas nados/as entre o 1/01/2010 e o 31/12/2017. 

Ofértanse prazas para menores con diversidade funcional. Existe a posibilidade de contar con intérprete de lingua de signos.

Terán preferencia para a obtención dunha praza os e as menores empadroados/as na cidade da Coruña cuxos proxenitores/as ou titores/as teñan que traballar durante a quincena na que solicitan os campamentos.

O Servizo Municipal de Deportes poderá requirirlles a documentación acreditativa de que efectivamente teñen que traballar durante a quincena na que solicitan o campamento.

O Servizo Municipal de Deportes realizará de oficio a comprobación do padrón municipal no requisito de empadroamento do/a menor.

No caso de que se produza un engano na declaración responsable que se debe presentar asinada para realizar a inscrición, o/a menor perderá o dereito a obter unha praza nos campamentos deportivos municipais.

ONDE SE VAN REALIZAR​?

Os campamentos terán como sede catro instalacións deportivas municipais:

• Campamento de Riazor: no Polideportivo Multiusos de Riazor (antigo Frontón)
• Campamento de Novo Mesoiro: no Polideportivo de Novo Mesoiro
• Campamento do Barrio das Flores: no Polideportivo do Barrio das Flores
• Campamento da Torre: no Frontón da Cidade Deportiva de A Torre 

Estas sedes se utilizarán como punto de entrega e recollida dos nenos e das nenas. Intentaranse realizar actividades ao aire libre, para o cal se poderán desprazar a outras instalacións deportivas.

CANTO DURAN​?

Os campamentos deportivos municipais organizaranse por quincenas, desde o 1 de xullo ata o 31 de agosto, de luns a venres. Non se realizarán campamentos as fins de semana nin os festivos. 

Poderase escoller entre as seguintes quincenas:

• 1º turno: Do 1 ao 15 de xullo
• 2º turno: Do 16 ao 31 de xullo
• 3º turno: Do 1 ao 15 de agosto
• 4º turno: Do 16 ao 31 de agosto

CAL É O HORARIO?

As actividades dos campamentos desenvolveranse de luns a venres en horario de 09:00 a 14:00 horas.

Poderá solicitar o horario ampliado, coa posibilidade de entrega dos e das menores ás 08:30 e de recollida ás 14:30 horas (unha ou ambas opcións). O horario ampliado non supón un maior custe para as familias.

CANTAS PRAZAS SE OFERTAN? 

Ofértanse un total de 960 prazas, que supoñerán 240 prazas por quenda, coa seguinte distribución:

• Campamento de Riazor: 120 prazas.
• Campamento de Novo Mesoiro: 48 prazas
• Campamento de Barrio das Flores: 48 prazas
• Campamento de A Torre: 24 prazas

Esta distribución poderá sufrir variacións en función da demanda e do aforo das instalacións.

CAL É O PREZO DOS CAMPAMENTOS?

O prezo dos campamentos deportivos municipais é de 25 euros por cada quenda e menor.

A solicitude do horario ampliado non supón un maior custe para as familias.

O pago realizarase conxuntamente coa inscrición no campamento de forma telemática a través do enlace que se publicará nesta web ou de forma presencial, nos rexistros de deportes (recomendable pedir cita previa).

As persoas que durante o prazo establecido non teñan formalizada a inscrición do/a menor, entenderase que renuncian á praza obtida e procederase a activar a listaxe de agarda.

DATAS A TER EN CONTA

As principais datas a ter en conta son as seguintes:

• Preinscrición: os días 22, 23 e 24 de maio de 2023 (Recomendamos revisar o punto 8 das bases para as preinscriciòns de membros da mesma familia). 
• Publicación da listaxe provisional de solicitudes: publicarase o 29 de maio de 2023.
• Alegacións: os días 30 e 31 de maio de 2023. 
• Publicación da listaxe definitiva de solicitantes: 1 de xuño 2023, ao longo da mañá.
• Sorteo: o 1 de xuño, pola tarde.
• Publicación das listaxes de persoas admitidas e en lista de agarda: o día 6 de xuño na web de Deportes ou no 010.
• Formalización da matrícula ou renuncias: 7, 8 e 9 de xuño de 2023, telemáticamente a través do enlace que se publicará nesta web ou presencialmente nos rexistros de deportes.
• Comezo dos campamentos: O luns 3 de xullo de 2023 comezará a primeira quenda.

PREINSCRICIÓNS

As solicitudes para participar nos campamentos realizaranse, do 22 ao 24 de maio, a través do seguinte formulario:

Solicitude de inscrición nos campamentos deportivos de verán

Poderase solicitar un máximo de 3 opcións, por orde de preferencia. Non se deberá solicitar unha quenda ou sede que non se desexe obter.

No caso de detectar máis de unha preinscrición para unha mesma persoa, aceptarase a última recibida, entendéndoa como corrección da/s anterior/es. As realizadas con anterioridade quedarán desbotadas e non se terán en conta.A dirección de correo consignado na preinscrición será o que se empregue sempre para as comunicacións durante o proceso.

Recomendamos revisar o punto 8 das bases para as preinscriciòns de membros da mesma familia, no caso de que queira solicitar praza para varios fillos e/ou fillas, e sempre e cando se desexe ter garantida praza para todos/as na mesma sede e quenda, deberase facerse o seguinte:

• Realizar unha inscrición por cada menor pertencente a unha mesma familia, na páxina web e de forma continuada no tempo.
  • Nota: Enténdese que non se incumpre este requisito no caso de que se metera algunha solicitude polo medio como consecuencia de realizar a inscrición online.
• Realizar todas as inscricións relativas aos/as menores dunha mesma familia (irmáns e irmás) cun mesmo NIF, NIE ou número de Pasaporte correspondente ao pai, nai, titor ou titora.
  • No caso de que se detecte duplicidade de inscricións con distintos datos para un ou varios menores dunha mesma familia, poderase perder o dereito a obter unha praza nun campamento deportivo municipal.

NON DEIXES PASAR O VERÁN SEN FACER DEPORTE. APÚNTATE!!