HeART of Gaza, fundado por Mohammed Timraz (Gaza) e Féile Butler (Irlanda), comezou como un intercambio de arte infantil a través de WhatsApp. Ambos comprenderon rapidamente que esta visión íntima da experiencia infantil do xenocidio debía compartirse co mundo.

A exposición foi presentada xa en numerosas cidades -de Chicago até Roma, de Londres a Berlín-, levando por todo o planeta a visión das crianzas sobre as atrocidades que se están a cometer contra o pobo palestino.

A primeira mostra tivo lugar en Irlanda, en xullo de 2024, mostrando 55 obras de 12 artistas vivos (nenos e nenas de 3 a 17 anos) e 2 crianzas asasinadas (de 9 e 13 anos). O proxecto continúa medrando grazas á creación de "The Artists' Tent" en Deir al Balah, un espazo dedicado a obradoiros de arte.

O principio fundamental de HeART of Gaza é reverter a deshumanización: o xenocidio é resultado dunha deshumanización absoluta. Un grupo reduce ao outro a un estatus subhumano, pero tamén perde a súa propia humanidade para poder executar actos tan crueles.

Esta exposición é unha plataforma para que as crianzas -as máis vulnerables e silenciadas- compartan co mundo a realidade de vivir un xenocidio, amosando a súa dor, forza e esperanza a través da arte.

Cada obra está acompañada dunha pequena "declaración", que inclúe o nome, a idade, unha foto do artista e a súa propia descrición do traballo.