Tras a resolución das reclamacións/alegacións ás listaxes provisionais de solicitudes publicadas o pasado 13 de novembro, publícanse as listaxes definitivas da convocatoria extraordinaria de outubro para a cobertura de prazas vacantes na Rede de Escolas Infantís Municipais.

Listaxes definitivas de admitidos (26/11/2024)

A adxudicación dunha praza na escola indicada na primeira ou segunda opción implicará a eliminación das listaxes de agarda doutra opción solicitada.

As solicitudes que resulten adxudicatarias da praza poderán formalizar a matrícula tras a cita previa fixada pola escola correspondente. Os/as menores adxudicatarios/as deberán ter cumpridos tres meses no momento da matriculación.

O prazo de matrícula estará habilitado entre o mércores 27 e o venres 29 de novembro.

En decembro publicaranse as novas vacantes e o calendario do proceso correspondente.

Documentación necesaria

A persoa solicitante admitida deberá presentar na escola asignada, tras a cita previa fixada, a seguinte documentación:

• Carta sanitaria do/a menor.
• Carta de vacinas.
• De ser o caso, informe médico sobre alerxias ou intolerancias.
• Calquera outra documentación que a escola requira en función das circunstancias particulares de cada caso.

O cumprimento do calendario de vacinación infantil do programa galego de vacinación, así como a formalización da matrícula no prazo sinalado son imprescindibles para confirmar a praza. En caso contrario, a persoa interesada decaerá da súa solicitude e o dereito á praza e ofertaráselle á seguinte persoa solicitante en listaxe de agarda por rigorosa orde de puntuación.