O Servizo Municipal de Educación da Coruña anuncia o X Certame de Monólogos Cómicos en Lingua Galega, unha acción de dinamización lingüística na que se presentan monólogos cómicos creados e interpretados por alumnado de centros educativos do concello da Coruña. Os monólogos interpretaranse en galego e tratarán temas de actualidade.

Este certame está dirixido a alumnado de ESO, BACH e FP dos centros educativos do concello da Coruña e é de carácter gratuíto. O obxectivo é fomentar o uso da lingua galega no alumnado, potenciar a comprensión e a expresión oral, así como a creatividade e a espontaneidade no uso da lingua galega.

As persoas inscritas poderán solicitar os obradoiros de introdución á interpretación de monólogos cómicos, co obxecto de axudarlles a revisar os seus textos e mellorar a súa interpretación cómica. A inscrición realizarase do 25 de xaneiro ao 17 de febreiro a través da ficha de solicitude.

O certame dividirase en tres categorías: Categoría A (alumnado de 1º e 2º curso da ESO), Categoría B (alumnado de 3º e 4º curso da ESO) e Categoría C (alumnado de BACH e ciclos formativos de FP). Cada centro docente poderá presentar o alumnado participante de maneira individual ou en grupos de máximo tres alumnos/as. Estableceranse premios por categorías.

O certame terá lugar o 14 de abril de 2023 e as condicións e prazos para presentar os textos dos monólogos publicaranse con antelación polo Servizo Municipal de Educación.