A mobilidade ten sen dúbida un valor positivo, pero tamén ten unha carga negativa: os accidentes de tráfico e a contaminación; esta última provoca máis de 16.000 mortes prematuras ao ano. As policías locais estamos especialmente sensibilizadas con estes problemas e levamos máis de 30 anos dedicando esforzos a educar a escolares de diferentes idades, cunha visión da educación viaria integral, inicial e permanente.

Procurando que A Coruña se converta nunha cidade máis amable co medio, máis segura e máis saudable, ofertamos esta actividade en bicicleta que ten ademais o obxectivo de mesturar a educación viaria e os contidos escolares. Xa que dispoñemos de moitos recursos para este fin, contrátase un grupo de guías oficiais de Galicia que, caracterizados de personaxes relevantes da nosa historia como María Pita, Sir Jhon Moore, Breogán ou Eusebio da Guarda, lle ensinan ao alumnado os segredos e as anécdotas que esconden as rúas e edificacións da Coruña.