A Xunta de Goberno local aprobará mañá unha nova convocatoria por parte de Benestar Social das bolsas comedor para o curso 2020/2021, en que se amplía a cobertura da axuda a períodos vacacionais para aquelas nenas e nenos que sexan beneficiarias/os e que conten cun informe técnico dos equipos de atención social que detecten neles un risco de exclusión social. Por outra parte, auméntase a renda per cápita, que pasa dos 6.000 aos 7.000 euros, e increméntase de 3.000 a 3.600 euros o importe da dedución por alugamento e/ou hipoteca. Así mesmo, as/os escolares que pertencen a familias beneficiarias de RISGA e Renda Social Municipal equipararanse á puntuación máis alta no nivel de renda.

Ademais, as persoas solicitantes serán as e os escolares, polo que se comproborán exclusivamente as débedas que teñan eles. Outra das novidades é que para calcular os ingresos da unidade familiar terase en conta aos proxenitores ou titores xunto ás fillas e fillos beneficiarios. Entre as melloras da convocatoria, está a de permitir ser beneficiarias/os a persoas maiores de idade. Deste xeito, poderá solicitar as bolsas o estudantado repetidor.

A nivel administrativo, procurarase que a redacción da convocatoria, os impresos de solicitude e os anexos sexan o máis sinxelos posible para que as persoas demandantes non cometan ningún erro á hora de cumplimentaren os formularios e achegaren a documentación requirida, así como en autorizaren ao Concello a consulta destes datos.