Os Paseos pola Coruña Literaria, que organiza Normalización Lingüística do Concello da Coruña xunto coa Asociación de Escritores/as en Lingua Galega, teñen datas e protagonistas para esta primavera. Olivia Rodríguez González, María Canosa, África López Souto e Xosé Antón Bocixa con Emma Pedreira levarannos por diferentes localizacións da cidade que ambientaron ou inspiraron as súas obras. Serán ás 12.00 h e terán unha duración aproximada de hora e media. 

O calendario será o seguinte:

• 21 de marzo, con Olivia Rodríguez. "A Coruña de Luz Pozo Garza". Faremos un percorrido polos espazos vitais e poéticos de Luz Pozo Garza na nosa cidade e deterémonos naqueles lugares máis significativos na súa traxectoria.
• 4 de abril, con María Canosa. "Peregrina na miña cidade". O paseo rememorará a visión de dúas protagonistas dos últimos libros da autora. Nunha delas, a protagonista chega á cidade por mar e sentirase atraída por todo aquilo que é a fachada da cidade pero tamén polo que queda ás súas costas. A segunda protagonista vive dentro da cidade e transita os espazos menos pintorescos e máis prosaicos, o día a día, a cidade que se "usa".
• 18 de abril, con África López. Concepción Arenal na Coruña: escoitando as 'malas mulleres'. Faremos un percorrido aberto e participativo pola presenza de Concepción Arenal na nosa cidade, incidindo nas súas perspectivas en relación a unha visión humanitaria do castigo, a potencia da amizade entre mulleres, centrada na súa relación con Juana de Vega, e o legado que deixou a súa vida e obra na nosa cidade.
• 9 de maio, con Xosé Antón Bocixa e Emma Pedreira. "O éxodo, a ruína". Un paseo pola poética da memoria e da casa baleira e abandonada e que fica no silencio da ruína, desde o audiovisual ao literario, coa mirada diversa e complementaria destes creadores.

Prazos e forma de inscrición

Os Paseos pola Coruña Literaria están destinados a persoas maiores de 16 anos e son gratuítos. É necesaria a inscrición, pois están limitados a 55 prazas.

A inscrición pódese facer en Normalización Lingüística no Centro Ágora, chamando ao 981 184 200 ext. 34333 e 34321 (a partir das 9.00 h, en calquera dos casos) e no correo inscricionslingua@coruna.es, nas seguintes datas:

• Olivia Rodríguez. Inscrición desde o xoves 12 de marzo
• María Canosa. Inscrición desde o luns 23 de marzo
• África López. Inscrición desde o luns 6 de abril
• Xosé Antón Bocixa e Emma Pedreira. Inscrición desde o luns 27 de abril