"De aquí para alá" é un proxecto didáctico-musical para público infantil no que viaxamos arredor do mundo aprendendo, escoitando, bailando e cantando as músicas de cada lugar facendo partícipe o público que nos acompañe na procura de novos sons!

Nesta ocasión, ten un formato cantacontos onde a autora, Lydia Botana, a través da música, nos contará a historia dunha bolboreta que vai polo mundo na procura de algo que faga feliz ao seu novo amigo Gali, un neno que vive en África e está moi triste.

Embarcarémonos nunha viaxe musical arredor do mundo pasando por todos os continentes, mostrando as distintas tradicións, bailes, música, instrumentos, fauna, flora... tratando de espertar o interese pola música e as culturas doutros lugares valorando a diversidade e, por suposto, respectándoa, dun xeito divertido.

Agárdannos xéneros musicais coma a bossa-nova, o rap, o son cubano, o reggae...

A actividade desenvolverase nunha aula do Centro Ágora e haberá dous pases: ás 17.00 e ás 18.30 horas. Por mor das restricións pola situación sanitaria a cada pase só poderán asistir 15 familias (crianza + persoa adulta).

Organiza Normalización Lingüística do Concello da Coruña dentro do programa Apego.

REQUISITOS POLA SITUACIÓN SANITARIA:

• Non poderán acceder ao evento aquelas persoas con síntomas compatibles coa COVID-19, aquelas diagnosticadas coa enfermidade e que non finalizasen o período de illamento ou as persoas que estean en período de corentena domiciliaria por teren contacto estreito con algunha persoa con síntomas ou diagnosticada de COVID-19.
• Asistirá á actividade a crianza inscrita cunha persoa adulta responsable.
• Manterase correctamente posta a máscara dende que se entra no centro ata que se sae. É obrigatoria dende os 6 anos. 
• Evitaranse aglomeracións e accederase ás aulas de xeito ordenado e gardando a distancia de seguridade.
• Aplicarase solución hidroalcohólica nas mans ao entrar e ao saír do recinto.
• Seguiranse as instrucións do persoal organizador.