22 de setembro de 2022
Xa está dispoñible o servizo de reservas para os grupos educativos, que poderán gozar de experiencias únicas programadas para este curso.
A Casa das Ciencias, a Domus e o Aquarium Finisterrae xa están preparados para recibir aos grupos escolares cunha oferta de exposicións, obradoiros e proxeccións que permitirán ao alumnado complementar os contidos curriculares.
No Aquarium Finisterrae a principal novidade é a oferta de itinerarios temáticos, como o titulado «Reproducirse baixo o mar», para coñecer os variados procesos de reprodución que empregan as especies mariñas, o itinerario «Planeta océano», no que se abordan diferentes cuestións oceanográficas (salinidade, mareas, correntes), efemérides históricas e a diversidade biolóxica na sala Maremagnum, ou o itinerario «Sinais de alarma», sobre algúns dos cambios ambientais que están a sufrir os océanos e que ameazan a súa biodiversidade.
Na Domus, os grupos escolares poderán coñecer o recentemente renovado vídeo do parto, coas imaxes de dous nacementos que amosan un proceso biolóxico polo que pasamos todos os seres humanos e que ten lugar case 400.000 veces cada día en todo o planeta. A visita polas salas de experiencias interactivas pódese complementar con sesións de cinema e con actividades e obradoiros no Laboratorio Aberto e na sala maker@domus. Experimentar coa técnica da PCR, a disección de flores, explorar diferentes aspectos da nutrición ou construír unha variedade de mecanismos e artefactos tecnolóxicos utilizando materiais sinxelos e moita imaxinación son algunhas das súas propostas.
Na Casa das Ciencias, unha das principais novidades será a renovada incubadora de pitos, cun deseño que permitirá contemplar mellor o proceso de eclosión do ovo e o nacemento de pitos de galiña. Ademais, a oferta escolar para este curso ofrece un abano de programas de Planetario para os diferentes niveis educativos, incluíndo sesións en directo sobre o ceo que se pode contemplar na época da visita.
Os grupos escolares gozan de tarifas reducidas para o acceso aos Museos Científicos. No caso dos centros educativos do municipio da Coruña a entrada é gratuíta.
Museos-Cientificos_Oferta-Educativa-curso-22-23-PROGRAMA-GAL.pdf (2 MB)
Tamén che pode interesar
21 de marzo de 2024
A Casa das Ciencias, a Domus e o Aquarium Finisterrae abren todos os días de 10.00 a 19.00 horas.
7 de marzo de 2024
Trátase dunha vela realizada por escolares do CEIP Isidro Parga Pondal de Santa Cruz, Oleiros, con deseños e mensaxes sobre a conservación do planeta.
6 de febreiro de 2024
Para visitar o Aquarium ou asistir a unha sesión de Planetario será imprescindible realizar unha reserva de entradas, que poderá facerse desde o sábado 10 de febreiro. A entrada á Domus será libre.
Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible