Por sétimo ano consecutivo a asociación de makers Bricolabs organiza a Feira OSHWDem (Open Source Hardware Demonstration) de tecnoloxía aberta, que se realiza cada ano na Domus.

A feira incluirá ao longo de toda a xornada multitude de actividades, como as competicións onde se poderá ver a robots pelexando de forma autónoma, resolvendo complexos labirintos á velocidade da luz e competindo entre eles en carreiras incribles.

Tamén se propón o Reto CloneWars de impresión 3D colaborativa no que se trata de encher unha parede da sala domus@maker con engrenaxes de diversas cores e formas xeradas con impresoras 3D.

E o Reto e-téxtiles, no que se pretende formar un panel con pequenas mostras do que se pode construír con esta tecnoloxía.

Ademais haberá unha exposición con máis de 50 proxectos, mini charlas, concursos e talleres, dirixidos a todo o público que se achegue á Domus este sábado, no que a entrada será gratuíta.