O sanatorio de atención veterinaria á poboación de focas que habita o Aquarium Finisterrae ampliouse e mellorouse para atendelas de forma máis adecuada. As novidades na instalación inclúen a creación dunha nova piscina de illamento cunha subministración continua de auga salgada, dous espazos diferenciados de zona húmida e seca, a colocación de portas corredizas e unha pantalla visual para que as focas non estean tan expostas ao público durante as revisións sanitarias.

A nova instalación servirá para realizar exploracións aos exemplares de Phoca vitulina, así como para o seguimento de procesos de recuperación tras enfermidades ou para levar a cabo tarefas vinculadas á hixiene.

Once exemplares

Na actualidade, o Aquarium Finisterrae conta con once individuos de foca común. As máis maiores, Petra e Hansi, chegaron á instalación no ano 2000. A reprodución de exemplares no 2003 deu lugar ao nacemento de Deneb e Altair, as primeiras focas coruñesas.