O Aquarium Finisterrae organiza a actividade «Viaxe ao centro do Aquarium» os sábados 10 de outubro, 21 de novembro e 5 de decembro de 11.30 a 13.30 horas, co obxectivo de achegarlle a ciencia á cidadanía e mostrar os espazos técnicos e os procesos que fan posible o funcionamento do acuario coruñés. Esta actividade de divulgación científica e educación ambiental está dirixida a maiores de 16 anos e dispón dunha capacidade máxima de 12 participantes. O prezo da entrada é de 10 euros, agás para os membros da Asociación de Amigos da Casa das Ciencias, para os titulares da Tarxetas Vente e para persoas con discapacidade, que é gratis. As entradas estarán dispoñibles a partir do luns 5 de outubro ás 10.00 a través desta ligazón.

Durante a visita, o persoal técnico do centro guiará ás persoas participantes polas zonas de bombeo, filtración, laboratorio, cociña, corentenas e a sala de cultivos auxiliares. Os asistentes poderán observar os recursos e sistemas que se empregan para manter en condicións óptimas os millóns de litros de auga mariña que circulan cada día polos tanques e formular as súas preguntas sobre a conservación da biodiversidade mariña.