Xperimenta virtual é un proxecto para grupos de 3º a 6º de Educación Primaria de centros escolares da Coruña. Os grupos participantes realizarán na súa aula unha disección de flores que será guiada a través dunha videoconferencia por unha persoa do equipo de educación da Domus.

A actividade, que é gratuíta e ten unha duración duns 45-50 minutos, realizarase a través de Google Meet. Para participar é necesario realizar unha solicitude enchendo un formulario de reserva.

Os grupos escolares que teñan unha reserva para esta actividade recibirán previamente na súa aula unha caixa cos materiais necesarios e desinfectados (unha flor Lilium, tesoira, pinza, bandexa, cinta adhesiva, etc) para que cada estudante poida seguir as instrucións que lles irán facilitando desde a Domus.

O profesorado responsable de cada grupo participante recibirá ademais un xogo de Kahoot para utilizar despois da actividade co seu alumnado. Trátase dun xogo deseñado especialmente para esta actividade coa plataforma gratuíta Kahoot, que permite a creación de concursos na aula para aprender ou reforzar a aprendizaxe e onde o alumnado é quen concursa.

Xperimenta virtual é un proxecto da Concellería de Educación do Concello da Coruña en colaboración cos Museos Científicos Coruñeses.