O Aquarium Finisterrae estrea horario de verán, que estará vixente do 1 de xullo ao 31 de agosto. Neses dous meses a apertura de visitas será de 10.00 a 20.00 horas, aínda que o acceso péchase ás 19.00 horas. Para visitar a Casa dos Peixes é preciso realizar unha reserva de entrada previa, co fin de facilitar o control de acceso dun máximo de 30 persoas cada 20 minutos. Unha vez dentro das instalacións, a visita ten duración ilimitada. A reserva debe realizarse por internet, con ata tres días de antelación, a través deste enlace web.

Poderán reservarse un máximo de cinco entradas por persoa e elixirase o día e tramo horario segundo a dispoñibilidade.

Condicións das visitas

Todas as persoas que visiten o Aquarium Finisterrae deberán gardar unhas normas de seguridade, como usar de forma obrigatoria a máscara, sen válvula exhalatoria (segundo a resolución do 25 de xuño de 2020, da Secretaría Xeral Técnica da Consellería de Sanidade, Xunta de Galicia), durante toda a visita e manter a distancia de dous metros entre persoas coas que non convivan. Ademais evitarase tocar calquera obxecto ou superficie, e os elementos interactivos do museo permanecen deshabilitados.

Sala Nautilus

Polas súas características, o acceso á sala Nautilus poderá organizarse puntualmente en quendas de 20 minutos en grupos de tamaño reducido e acompañados por unha persoa do centro. Para compensar estas restricións, o prezo da tarifa reduciuse de 10 a 4 euros.