A través de varias visitas de inspección realizadas ao longo do mes de outubro aos hortos de Agra do Orzán, Eirís e Novo Mesoiro, o Servizo de Medio Ambiente constatou que hai dezasete parcelas e sete mesas de cultivo que levan sen ser traballadas durante un período superior a un mes, e sen que conste na Concellaría de Medio Ambiente que os seus adxudicatarios presentasen algunha xustificación para tal incumprimento.

As bases da convocatoria actual do uso de hortos urbanos (publicada no BOP núm. 28 do 10 de febreiro de 2022) establece que dita autorización "poderá ser revogada unilateralmente polo Concello en calquera momento, e sen máis trámite, por razóns de interese público, sen dereito a indemnización (...)" se se detectan unha serie de incumprimentos, entre eles "no caso de que se produza falta de uso durante un período superior a un mes sen xustificación, exceptuando os meses de decembro a febreiro".

Por tal motivo, o Concello iniciou o procedemento de revogación das autorizacións de cultivo nas parcelas indicadas a continuación:

Os seus adxudicatarios recibirán unha notificación comunicándolles o inicio do procedemento e dándolles un prazo de dez días para presentar as alegacións que consideren oportunas. O cómputo do prazo iniciarase o día seguinte da recepción da dita notificación.

Nos casos nos que non se presente ningunha alegación, resolverase o expediente coa adxudicación da parcela á persoa que corresponda, segundo a listaxe de reserva existente nesta convocatoria (orde establecida conforme o punto 17 das bases que a regulan).