Con motivo da aprobación definitiva do proxecto de Urbanización do ámbito S2-San Pedro de Visma, que implicará un notable incremento da oferta de vivenda na nosa cidade, é inminente o comezo das obras de urbanización do dito ámbito que afectarán á totalidade das hortas da Agra do Orzán. 

Sendo coñecedores de que na época estival existen plantacións que non serán recollidas ata o mes de setembro, desde Medio Ambiente comunicóuselle á empresa concesionaria da urbanización a necesidade de que durante o período de verán se respecten as plantacións das hortas da Agra do Orzán, para que as persoas usuarias teñan a posibilidade de recoller as súas colleitas ao longo do mes de setembro.

A cláusula 17 das bases reguladoras da convocatoria de autorización para o uso das hortas urbanas da Agra do Orzán, Novo Mesoiro, Parque de Eirís e Parque de Adolfo Suárez, publicadas no Boletín Oficial da Provincia da Coruña número 28, de 10 de febreiro de 2022, sinala que "A autorización poderá ser revogada unilateralmente polo Concello da Coruña en calquera momento, e sen máis trámite, por razóns de interese público, sen dereito a indemnización, cando resulten incompatibles coas condicións xerais aprobadas, produzan danos no dominio público, impidan a súa utilización para actividades de maior interese público ou menoscaben o uso xeral."

Polo exposto, as hortas da Agra do Orzán poderán manter a súa actividade ata o día 30 de setembro do 2024, momento a partir do cal quedarán revogadas todas as autorizacións vixentes ata o momento, sen que as persoas usuarias poidan acceder ás ditas instalacións.