Concello da Coruña

Comunicado da concellería

1.         A concellería determinou onte a situación e recolocación de aseos portátiles repartidos por varios puntos da cidade. Estes nove urinarios que, xunto aos xa existentes farán un total de case 50, daranlles servizo esencialmente ás e aos traballadores de servizos públicos básicos que deben proseguir a súa actividade na rúa, tal e como reflicte o Decreto do Estado.

2.         Ademais, comunicoulles a todas as empresas concesionarias de aparcadoiros públicos dependentes do concello que deberán abrir os seus aseos as 24 horas do día para todas aquelas traballadoras e traballadores de servizos básicos que necesiten utilizalos.

3.         A Concellería de Medio Ambiente seguiu para iso as suxestións que algunhas empresas concesionarias lles achegaron para colocar os baños, como no caso dos que están situados nas cabeceiras de liña dos autobuses. Unha vez que se instalen todos os váteres ao longo desta mañá, comunicaráselles a actualización das localizacións ás empresas concesionarias de transporte público, limpeza e recollida de residuos, mantemento de parques e xardíns, e todos aqueles servizos públicos básicos municipais. Así mesmo, publicaranse na nosa web.

4.         A Concellería de Medio Ambiente entende que a demanda do sindicato STL está deste xeito satisfeita, polo que non entendería que se deixase de prestar un servizo esencial para garantir a salubridade e hixiene da cidade, máxime nun estado de alarma provocado por unha crise sanitaria como a que desafortunadamente vivimos.

5.         Solicítaselle, por tanto, ao cadro de persoal deste servizo básico que cumpra cun cometido tan importante como o da limpeza na cidade, posto que entendemos que as demandas trasladadas a esta concellería xa foron atendidas.

6.         Por iso, esperamos que o servizo funcione con normalidade a partir das 22.00 horas de hoxe en vista das actuacións levadas a cabo pola Administración municipal.

7.         No caso de que se interromper este servizo básico esencial e seguindo o establecido no Decreto do Estado de Alarma, anunciado o pasado sábado día 14 de marzo polo Goberno central, o concello tomaría todas as medidas legais ao seu alcance para garantir a limpeza da cidade ante o problema sanitario en que nos encontramos.

LISTAXE DE APARCADOIROS CON ASEOS ABERTOS A DISPOSICIÓN DOS SERVIZOS ESENCIAIS

1. Aparcadoiro Salgado Torres

2. Aparcadoiro Elviña

3. Aparcadoiro Mercado Elviña

4. Aparcadoiro Matogrande

5. Aparcadoiro Palloza

6. Aparcadoiro Fábrica de tabacos

7. Aparcadoiro Praza de Galicia

8. Aparcadoiro Palacio da Ópera

9. Aparcadoiro Praza de Vigo

10. Aparcadoiro Praza de Lugo

11. Aparcadoiro Cantóns

12. Aparcadoiro María Pita

13. Aparcadoiro Mestranza

14. Aparcadoiro Monte Alto

15. Aparcadoiro Mariñeiros

16. Aparcadoiro Conchiñas - Teixeira de Pascoaes

17. Aparcadoiro das Conchiñas

18. Aparcadoiro Casa da Auga

19. Aparcadoiro de Orzán - Riazor

20. Aparcadoiro da praza de Pontevedra

21. Aparcadoiro Os Mallos

22. Aparcadoiro Monforte

23. Aparcadoiro Materno - Oncolóxico

24. Aparcadoiro Parque San Diego centro deportivo

25. Aparcadoiro Parque Europa

Animais de compañía e colonias felinas

Seguindo as recomendacións elaboradas pola Dirección Xeral de Dereitos dos Animais, dependente do Ministerio de Dereitos Sociais e Axenda 2030, a Concellería de Medio Ambiente acaba de aprobar as seguintes pautas en materia de animais de compañía durante o estado de alarma:

I. Saída con cans á vía pública. Está permitido saír do domicilio co fin de sacar a pasear os cans, pero deberanse observar en todo momento as seguintes medidas:

1) Os cans deben ser paseados, na medida do posible, polos seus propietarios e propietarias. Será obrigatorio levar a documentación identificativa do animal debido a que as/os axentes de policía poderán solicitala.

2) A saída será polo tempo estritamente necesario para cubrir as necesidades fisiolóxicas do can.

3) Os cans irán permanentemente suxeitos con correa, e evitarase en todo momento o contacto con outros cans e/ou persoas. Non se poderán deixar soltos en ningún espazo público nin privado de uso público, nin en espazos privados con fácil acceso desde a vía pública.

4) Ao sacar o can á vía pública deberase levar unha botella de auga con deterxente para limpar os ouriños, así como bolsas para recoller as deposicións.

II. Alimentación de colonias felinas. As asociacións de voluntarios e voluntarias que actualmente xestionan as colonias felinas existentes no termo municipal están autorizadas para que acudan a alimentar os gatos das súas colonias e deberán observar en todo momento as seguintes normas:

1) Só se autoriza a unha persoa por cada asociación e/ou colonia felina para acudir a alimentar os gatos, respectando as normas establecidas nos convenios, relativas a lugar de alimentación, clase de alimento e medidas de limpeza e hixiene.

2) A alimentación dos gatos realizarase preferiblemente en horarios de menos afluencia, e tratarase de espaciar o máximo de días posibles, sen que caiba a alimentación diaria.

3) Evitarase todo contacto cos animais, salvo que excepcionalmente sexa necesario. Nese caso observaranse as medidas de hixiene posteriores.

4) Non se permite a caza de gatos para esterilización ou tratamentos durante a vixencia do estado de alarma.

A Concellería de Medio Ambiente e Sustentabilidade achegaralles ás asociacións e persoas voluntarias que están a cargo das colonias felinas unha autorización para se identificaren en caso de ser requeridos polas forzas de seguridade.