Stompy Seven Jass Band é unha banda especializada no Hot Jazz, Dixieland e Blues xurdidos nos marabillosos anos 20 do século pasado en Nova Orleans, de onde saltou a Chicago, Nova York e de aí ao resto do mundo.

Entre as influencias desta banda destacan músicos como Louis Amstrong, Jelly Roll Morton, a Original Dixieland Jass Band, Sidney Bechet e King Oliver, entre outros moitos.

A música de todos estes grandes mestres soa novamente intrepretada por este grupo baixo un punto de vista propio e orixinal, mantendo toda a esencia deste estilo musical e homenaxeando respetuosamente a todos estes xenios que deron un novo rumbo á historia da música.

Stompy Seven Jass Band revive este estilo tan popular onde se mesturan os ritmos do charleston, fox trot e swing, entre moitos outros, que non deixará indiferente a quen se pare a escoitar, iniciando unha viaxe a aquela época tantas veces representada no mundo do cine.

Esta agrupación componse dunha primeira liña de ventos (trompeta, clarinete e trombón) e unha sección de ritmo (banjo, contrabaixo e batería) que fan o soporte perfecto para a voz de Mery Lafuente, quen tamén toca a táboa de lavar e outros pequenos e variados instrumentos.