Concello da Coruña

Que son as Naves do Metrosidero?

Trátase dun equipamento público de máis de 1.000 metros cadrados destinado a dotar a cidade dun espazo plural, diverso e inclusivo para que a mocidade de 12 a 30 anos poida desenvolver as súas inquietudes creativas, produtivas, de investigación, de aprendizaxe e formación e lúdicas, tanto a nivel individual como colectivo.

As Naves do Metrosidero contan con espazos interiores e exteriores que posibilitan un uso polivalente e á vez integrador. Cada unha das tres naves que conforman o conxunto do proxecto ten unha natureza distinta, coa vontade de confluír nos espazos comúns de convivencia.

Como son os espazos das Naves?

Nave 1- Nave de aprendizaxe e talleres. Esta nave dispón de diferentes zonas versátiles.

Un gran recinto de múltiples usos que inclúe pequenos espazos no seu interior -dotados de luz natural, ventilación, mobiliario móbil e pregable- nos que se desenvolven actividades, talleres e formación en emprendemento, tecnoloxía, deseño, videoxogos, xogos de rol e de estratexia, fotografía e todos aqueles temas de interese para a mocidade.

Tamén é un espazo que se pode vincular a actividades de ensaio, investigación, residencias artísticas, formación, produción e presentacións escénicas (circo, danza, teatro, música, poesía e outras relacionadas coas artes vivas, visuais e plásticas).

Nave 2 - Nave de prácticas deportivas urbanas: un espazo orientado á práctica e a formación en deportes urbanos: skate, parkour, patinaxe, rocódromo etc.

Este espazo consta dun chan adaptado á práctica dos citados deportes urbanos e conta con todos os elementos precisos para a súa práctica. Dispón dunha parede vertical equipada como rocódromo e dun espazo de almacenaxe ampla para dar cabida aos materiais necesarios para estas prácticas deportivas.

Nave 3- Nesta nave existen dúas zonas diferenciadas. Nunha atópase un dos puntos de información xuvenil -CMIX- da cidade e a outra dispón de zona de almacenaxe, mesas e mobiliario para traballo colaborativo con puntos de ordenador e rede. Neste segundo espazo polivalente lévanse a cabo, tamén, pequenos talleres e "pílulas informativas" de interese xuvenil, impartidos polo persoal do CMIX.

Espazos exteriores e de convivencia: a sala "Invernadoiro" funciona como espazo integrador, de encontro, transición e uso común entre persoas con intereses diversos. É un espazo dotado con conexión a Internet e mobiliario versátil e móbil para poder adaptalo ás necesidades da mocidade e realizar diferentes tipos de actividades.

O exterior dispón dunha zona ampla con mobiliario móbil e céspede artificial para poder gozar dunha reunión en grupo.

Como é o modelo de xestión?

As Naves do Metrosidero son un equipamento público municipal no que se poden experimentar sistemas e modelos de xestión plural. No espazo conviven servizos municipais, con programas e actividades públicas desenvolvidas por un equipo de dinamización propio, e espazos de autoxestión de actividades organizadas por entidades xuvenís, colectivos informais e/ou pola propia mocidade usuaria. Un espazo aberto 365 días ao ano e sete días á semana nun horario flexible e adecuado para o público ao que se dirixe e para as actividades que pode acoller.

As Naves do Metrosidero queren ser un espazo de referencia, que opera dende un concepto innovador nun equipamento único en Galicia e que aposta pola mocidade como suxeito activo e protagonista.

Horarios de apertura das Naves do Metrosidero

INVERNO

Mañás dos luns, mércores e venres: das 10.00 ás 14.00 horas. Sábados: das 11.00 ás 14.00 horas. Tardes dos luns a domingo: das 17.00 ás 22.00 horas

VERÁN

Mañás dos luns a sábado: das 11.00 ás 14.00 horas. Tardes dos luns a domingo: das 17.00 ás 23.00 horas

Datos técnicos

A superficie construída total é de 1.031,75 m², e as superficies de cada unha das naves son:

Nave 1: 176,56 m²

Nave 2: 402,97 m²

Nave 3: 344,97 m²

Invernadoiro: 107,25 m²