A concelleira de Igualdade e Diversidade, e reponsable de Seguridade Cidadá, Rocío Fraga, presentou esta mañá os catro novos vehículos lixeiros que o Concello vén de adquirir para o Servizo de Extinción de Incendios da Coruña . Os turismos, nos que o goberno local investiu 106.787,85, facilitarán o labor de transporte de persoas e de extinción de incendios do corpo de seguridade municipal. Tal e como destacou Rocío Fraga, estes vehículos que se incorporarán ao parque móbil de Agrela, "ampliarán e mellorarán o servizo tanto de transporte de persoal como de materiais necesarios nas intervencións". "Estamos a falar de equipos necesarios que permitirán que o corpo poida mellorar nos seus propios desprazamentos así como en distintas actuacións que se poidan realizar", explicou a concelleira, quen avanzou que o goberno local está pendente da chegada de novos vehículos de intervención "para un servizo que é un orgullo pola súa calidade profesional e humana".

O primeiro dos equipos é un todoterreo Pick-up Toyota Hilux, válido para o transporte de persoas e de material en intervencións do grupo de rescate acuático --para o transporte de material e remolque de embarcacións-- así como de apoio en intervencións de extinción. O segundo turismo, unha berlina Fiat Punto de tres portas, destinarase para labores de prevención así como de apoio á xefatura en desprazamentos. O terceiro é unha furgoneta mixta Fiat Doblo, que permite o transporte de até cinco persoas así como de carga en labores de prevención e mantemento, hidratantes e de apoio á xefatura do corpo. Finalmente, o Concello tamén adquiriu un furgón mixto Fiat Ducato habilitado para o transporte de até nove persoas pasaxeiras, e que se poderá utilizar tanto para o transporte de persoal así como para a asistencia a cursos ou xornadas dos membros do servizo de extinción de incendios. A presentación dos equipos tivo lugar na praza de Tabacos,  no marco do desenvolvemento das actividades vinculadas ao día do Patrón dos bombeiros --que se adiantou á xornada de hoxe pola coincidencia da efeméride coa festividade do Día Internacional das Mulleres--. Durante toda a mañá, membros do servizo realizaron accións co alumnado dos centros escolares San Francisco Xabier e Concepción Arenal, nas que introduciron, dun xeito didáctico, cuestións básicas de actuación en caso de incendio, do sistema de funcionamento dos detectores de fume ou vinculadas ás ferramentas e materiais dos vehículos que empregan os bombeiros nas súas saídas. As actividades continuarán durante toda a tarde, entre as 16.00 e as 19.30 horas, na mesma praza. Á vez, no Parque de Agrela realizaranse visitas guiadas ás instalacións, para achegar á cidadanía o labor do Servizo de Extinción de Incendios.