A primeira parte do taller consistirá en crear o noso Apalpador. Mentres decoramos a nosa manualidade para colgar na árbore, contaremos a historia do carboeiro galego. En Galicia existe a tradición do Apalpador ou Pandigueiro. É a figura mitológica dun carboeiro, ligado á tradición do Nadal, do que existen testemuñas nas comarcas de Sarria, O Courel e O Cebreiro, aínda que existe por toda Galicia. O Apalpador baixa a noite do 31 de decembro para visitar as nenas e os nenos, tócalles o ventre para ver se comeron o suficiente durante todo o ano e déixalles unha bolsa chea de castañas, eventualmente algún agasallo e deséxalles que teñan un ano novo cheo de felicidade e de fartura (abundante comer). Na segunda parte do taller crearemos unha tarxeta de Nadal. As shaker card son un formato de tarxeta scrap moi divertida e orixinal, que servirá tanto para adornar a árbore de Nadal, como para enviarlla a un familiar ou persoa querida.