Cremos que toda relación humana está determinada por puntos de unión e vencello co outro, ao tempo que tamén se subliña a súa separación e a súa diferenza. A ontoloxía é a parte da filosofía que pensa que son os seres e por que os seres humanos se acaban por constituír a partir da súa relación entre si, a partir das comunidades. Pois toda relación asume unha certa comunidade á que apela. Unha comunidade comunicativa, de entendemento, baseada nunha obra conxunta, nunha serie de actos. Mais a comunidade non pode, en ningún caso, pecharse en si mesma. Non pode ser orixe de si mesma nin ter unha finalidade última. Polo contrario, sempre se ve ameazada pola súa posíbel disolución. Por iso, para a comunidade quizais o importante sexa compartir aquilo do que ninguén se pode apropiar. Asumir o compartido na procura dunha comunidade que sempre lle abra paso a outra nunca definitiva.
 

Abraham Rubín (Ourense, 1978) é Doutor en Filosofía pola UNED, docente e investigador independente. Publicou en galego os ensaios "Da revolta italiana á potencia da multitude" (Estaleiro Editora, 2010), "Entre posmodernidade e utopía" (Estaleiro Editora, 2011) e "Acontecemento e desexo" (Proxecto Derriba Eds., 2012), todos baixo o pseudónimo Sören Hauser e dedicados ao pensamento de Antonio Negri, Fredric Jameson e Gilles Deleuze, respectivamente.

En castelán publicou a obra "El transcurso del acontecimiento" (Lima, UNAS, 2014).