O Partido Socialista comprometeuse co Club do Mar a apoiar as propostas da nova directiva, encamiñadas a mellorar as condicións das instalacións e a súa contorna. Así llo transmitiu o portavoz socialista, José Manuel García, e a secretaria xeral da Agrupación, Eva Martínez Acón, nunha visita á entidade na que tamén participaron a edil Pilar Neira e a secretaria de Deportes, Ana Yaquimenko.

Os socialistas percorreron as instalacións e coñeceron en detalle os plans que pretende levar a cabo a nova directiva que presiden Ángel Garmendia. Desde o PSOE valorouse o traballo e o compromiso da entidade cos barrios da súa contorna e coa cidade, no fomento da actividade deportiva, social e cultural.

A importancia do Club do Mar, polo amplo número de socios e actividades que desenvolve, é un punto fundamental na vida deportiva e social de Monte Alto e Durmideiras, o que supón unha necesaria renovación das instalacións, tanto no interior como no exterior, que o PSOE viu con bos ollos.

Neste sentido, desde o Partido Socialista sempre se destacou o esforzo desta entidade para facer un barrio máis acolledor e con mellores servizos.