O Concello comezou as obras de reurbanización das rúas Cultura e Pintor Francisco Lloréns co obxectivo de mellorar a seguridade peonil e a accesibilidade na zona, polo que se aumentará a superficie tanto para o tránsito a pé como para o desfrute da veciñanza. Para conseguir unha mellora da calidade de vida, incorporaranse elementos de mobiliario como bancos e papeleiras e adecuaranse os xardíns con rega e árbores.

Desta forma, o Goberno local de Inés Rey materializa unha demanda da asociación de veciños de Labañou, un barrio en que xa se acometeron actuacións na avenida de Gran Canaria, Francisco Rodríguez Otero e Sor Joaquina, para responder así ás peticións formuladas polas persoas residentes. Cun orzamento de 347.500 euros, o Concello modernizará ambas as vías tras pavimentar tanto a calzada reservada a persoas transeúntes como a dos coches, e diferenciaraas desde o punto de vista da accesibilidade. Nos últimos 20 meses, investiuse en Labañou un total de 875.292 euros en obras de mellora do espazo público e preto de 150.000 euros en equipamentos públicos sen incluír a partida para Cultura e Pintor Lloréns.

En concreto, nestas dúas rúas reordenarase o aparcamento público e realizaranse melloras na rede de pluviais e fecais. Instalarase unha nova canalización municipal e axeitarase a sinalización segundo a distribución pensada. Deste xeito, os tres ramais deste cruzamento de vías terán un primeiro tramo onde as beirarrúas estarán a un nivel superior da estrada pero cun paso peonil previo sobre elevado para facer máis lento o tráfico. A idea deste goberno é que as persoas volvan ser as protagonistas absolutas, polo que esta actuación entra dentro do plan Coruña Camiña que supón a creación de espazos urbanos de calidade para a veciñanza.

Pola contra, no cambio do cruzamento destes tres ramais, haberá unha única plataforma, de maneira que a zona exclusiva para as peoas e peóns e a calzada para vehículos situaranse á mesma cota.

Para marcar os distintos usos, empregaranse bordos delimitadores e diferentes pavimentos. Ao seren as dúas dun único sentido de circulación, disporanse prazas para estacionamento en liña nun lado ou en ambos da rúa e nas dúas marxes da beirarrúa, que terá un ancho mínimo de 2,20 metros. Está previsto que estes traballos se executen en oito meses.