O Concello da Coruña impulsa a caracterización enerxética do parque de edificios residenciais e vivendas do municipio da Coruña, como ferramenta para o coñecemento da situación actual da demanda enerxética, e para impulsar os procesos de rehabilitación enerxética que permitan mellorar a calidade de vida e o confort dos residentes.

Entre os seus obxectivos está o de fomentar os procesos de rexeneración urbana e empoderamiento fronte á enerxía identificando dentro o parque residencial do municipio aqueles edificios máis sensibles e necesitados de melloras enerxéticas, axudando aos seus propietarios ou inquilinos a participar activamente nun cambio de modelo enerxético.

Para iso preténdese realizar unha caracterización enerxética de diferentes edificios distribuídos entre os dez distritos da cidade da Coruña, xerando o perfil enerxético dun grupo significativo de vivendas e implantando un sistema de monitoraxe e vixilancia enerxética que permita seguir ao longo do tempo o grao de confort interior, así como o impacto da enerxía nas familias e na contorna.

Estes traballos deben servir ao municipio para desenvolver estratexias de aforro e eficiencia que impulsen un modelo enerxético máis sustentable buscando o máximo confort dos seus cidadáns co menor custo enerxético posible.

O proxecto divídese en dúas fases:

Fase 1: mapeo enerxético da cidade

» Caracterización enerxética de 60 edificios. Realizarase un informe xeral que recolla a información relevante do conxunto de todos os edificios, reflectindo para cada un deles a súa situación enerxética actual incluíndo a demanda actual e un inventario dos equipamentos comúns e individuais.

» Xeración de perfil enerxético 600 de vivendas. Estudaranse os consumos enerxéticos dos fogares, analizando os últimos 24 meses, xerando unha simulación enerxética de consumo a 24 meses. Do mesmo xeito detectaranse situacións de mellora na contratación enerxética avaliando as posibles accións de mellora e o grao de aforro enerxético e/ou económico.

» Monitoraxe enerxética de 240 vivendas. De entre as 600 vivendas das que se xere o perfil enerxético, serán seleccionadas 240 nas que se realizase a súa monitoraxe enerxética, co obxectivo completar a información sobre o comportamento enerxético e de confort interior (temperatura e humidade) destas vivendas.

A monitoraxe realízase con equipos de reducida dimensión instalados en contadores e nunha ou dúas das estancias principais da vivenda. Os equipos son energéticamente autónomos e transmitirán a información a través dunha rede de datos propia, polo que o seu funcionamento non supón consumos enerxéticos nin de datos das vivendas monitoradas.

Fase 2: monitoraxe de actuacións

» Monitoraxe enerxética de actuacións rehabilitación edificatoria: Realizarase unha avaliación do grao de mellora das condicións de confort interior e de redución da demanda enerxética dos edificios e vivendas tras a intervención rehabilitadora, mediante o control dos mesmos subministracións e situacións que na fase 1.

A fase 1 deste proxecto está cofinanciado nun 80% polo Fondo Europeo de Desenvolvemento Rexional (FEDER) no marco do Eixo 12 de Desenvolvemento Urbano do Programa Operativo Plurirregional de España.

INFORMACION SOBRE EIDUS CORUÑA

Contacto

Para calquera dúbida ou consulta, podes escribir ao correo electrónico aforraenerxia@coruna.gal ou chamar ao número de teléfono 604.047.337 (de luns a venres, en horario de 9:00 a 18:00).