A mediados de 1996, a empresa Dygra, que ata entón se dedicaba á produción de contidos multimedia, emprende a aventura de realizar unha longametraxe de animación. Cun guión de Ángel de la Cruz, o equipo liderado por Manolo Gómez e integrado entre outros por Alberto Taracido, Juan Nouche, David López e Javier Raigada acomete o proxecto. Serán cinco anos de arduo traballo, nos que foi necesario innovar en moitos ámbitos e formar ao equipo técnico, xa que esta é a primeira película europea que se realizaba en 3D e non había profesionais formados nin en Galicia nin practicamente en Europa. Anos despois, moitos destes profesionais participan en grandes producións de cine de animación en todo o mundo. Para converter a historia orixinal de W. Fernández Flórez nunha película de animación tomáronse como referencias a antropoloxía, os bosques e a arquitectura galega. Dese o punto de vista visual os referentes foron pintores como Llorens, Sotomayor, as pinturas de Castelao, etc. Na posprodución traballouse para recrear a luz e o ambiente de Galicia. O obxectivo era que os espectadores de todo o mundo sentiran a "atmosfera" galega.