O Centro Cívico de Monelos acolleu esta tarde un novo encontro participativo sobre o futuro do autobús urbano da Coruña, o quinto dos 11 encontros organizados polo Goberno de Inés Rey no marco do estudo para a definición da nova rede de autobuses.

A sesión iniciouse coa presentación da alcaldesa quen agradeceu ás persoas asistentes que se achegaran a participar e destacou o distrito 7 como o de maior poboación da Coruña, xunto co que máis liñas e paradas ten.

En total, cerca de medio cento de persoas participaron no encontro celebrado co obxectivo de recoller as cuestións prioritarias de cara ao futuro do servizo de transporte público. A alcaldesa estivo acompañada dos concelleiros e concelleiras José Manuel Lage, Noemí Díaz, Yoya Neira e Diana Sobral.

Ademais, o equipo técnico do estudo do transporte urbano presentou como está a ser o proceso e realizouse unha dinámica participativa na que as persoas asistentes puideron achegar propostas sobre frecuencias, liñas, accesibilidade, conexións intermodais ou cobertura territorial.

Peticións e suxerencias

O distrito 7 conta con aproximadamente 60.748 habitantes articúlase en 18 liñas de autobús urbano (1, 1A, 2, 2A, 4, 5, 12, 12A, 14, 17, 20, 21, 22, 23, 23A, 24, UDC) máis o BUH e cun total de 107 paradas. 

A enquisa realizada durante o encontro permitiu identificar cales son os aspectos máis valorados -e tamén os máis criticados- polos usuarios e usuarias do transporte urbano da Coruña. Practicamente o 80% das persoas que asistiron eran do distrito 7 e un 81% fixérono a título persoal. En total, case o 64% das persoas que asistiron dixeron empregar o autobús semanalmente, entre 1 a 5 días.

Como nos anteriores encontros, os prezos foron o elemento mellor valorado, cunha media de 9 puntos e case todas os aspectos foron puntuados por enriba de 5, coa accesibilidade (6,9) como segundo aspecto mellor valorado. Séguenlle as liñas e paradas (5,7), as marquesiñas (5,4) e a frecuencia dos servizos (5.1). A intermodalidade foi o aspecto peor valorado (4,6), así como o único que non acadou a metade da escala.

Neste sentido, a cidadanía identificou como ámbitos prioritarios de mellora a puntualidade e as frecuencias (30%) xunto coa accesibilidade (13%) e a adaptación a eventos masivos (12%). 

Próximos encontros

Este xoves, 8 de maio, ás 19.00 horas, terá lugar un encontro específico para a mocidade no Espazo Xuvenil do Remanso. Será o que marcará o ecuador dos encontros, que continuarán a finais de mes no Centro Cívico do Birloque.

O calendario previsto é este:

• 20 de maio: Centro Cívico do Birloque
• 29 de maio: Centro Cívico dos Rosales
• 5 de xuño: Fórum Metropolitano
• 10 de xuño: Centro Cívico de Eirís
• 12 de xuño: Centro Cívico de Elviña
• 14 de xuño: Circo de Artesáns

As persoas interesadas en participar nalgún ou nalgúns dos Encontros de Barrio programados ata mediados de xuño xa poden formalizar a súa inscrición a través desta ligazón. Ademais, toda a información sobre o proceso participativo estará dispoñible nesta web específica.