As súas autoras, todas con discapacidade intelectual -unha delas cega de nacemento-, convidan a percorrer imaxes que rompen prexuízos e barreiras. Cada obra é un testemuño persoal, entre a busca de instantes únicos, a exploración sensorial da cor ou o traballo en proxectos colectivos.

Esta exposición forma parte do Festigual 2025, o festival de todas. Un proxecto que celebra a súa novena edición mantendo o compromiso coa creación artística que nace desde as marxes, nos espazos onde a arte se converte nunha forma de participación e de encontro. Un festival coas persoas no centro da cultura.

Do 7 ao 28 de novembro, A Coruña volverá ser escenario dun festival que espalla a súa programación por máis dunha ducia de espazos da cidade.

A proposta deste ano reúne compañías profesionais e proxectos comunitarios apostando por formatos que amplían os límites da escena e achegan a cultura a todos os públicos.