Comisariado por X. Lois Gutiérrez Faílde, El Desengaño forma parte da programación da sexta edición de FFoco Festival de Fotografía da Coruña, que un ano máis terá lugar na Fundación Luís Seoane. Xunto á exposición da serie fotográfica "28 cruces" de Julián Barón, incluirase un documental dirixido por Manuel Vargas, así como un fondo de fotolibros, catálogos e material impreso diverso para a súa consulta.

Nos primeiros días do mes de novembro de 2002, o buque petroleiro Prestige afundíase tras sufrir unha vía de auga a uns 250 quilómetros da Costa da Morte, provocando un dos maiores desastres ambientais da historia de Europa, un acontecemento que tivo un enorme impacto político, económico, cultural e social. Os milleiros de voluntarios e a presión do movemento Nunca Máis minimizaron os danos da vertedura sobre unhas costas cuxos recursos eran e seguen sendo vitais para a poboación da zona.

En El Desengaño, Julián Barón recolle aquel episodio, un proxecto que, xunto a outros traballos como La herencia de Chernobyl (2001) ou Una nueva vida: rumanos en España (2002-2003) supuxo unha das primeiras tentativas do fotógrafo na definición do seu discurso. Estas imaxes en branco e negro, de carácter documental, formaron parte dun proceso de descubrimento do medio fotográfico.

O discurso artístico de Julián Barón experimentou desde entón diversas mutacións, servíndose en cada unha das súas diferentes etapas de novas ferramentas, métodos e estratexias. Cada nova experimentación visual provocou un "desengano" con respecto a traballos previos, unha renuncia que impulsaba a creatividade do autor a través da procura estética e do compromiso cunha idea aberta e complexa da obra artística, materializándose máis alá dos seus límites lingüísticos.

El Desengaño é un testemuño da paixón inicial pola imaxe, e ao mesmo tempo unha revisión sen xenealoxía ou nostalxia, formada por fragmentos dunha creatividade cuxa capacidade para xerar novos argumentos nace da transgresión dos elementos anteriores. Deste xeito, Barón reconstrúe e redefine a posición cara ás imaxes, que sitúan e reconfiguran a nosa memoria do acontecemento e de certo imaxinario atesourado desde entón ao redor do propio desastre do Prestige.

Toda a información sobre FFoco está aquí: ffocofestival.gal