As Fillas Bravas son tres pandeireteiras do lugar de Momán, parroquia de Padrenda, concello de Trabancas, que cantan coplas e contan historias escoitadas ou inventadas, con moita ironía e non menos sabedoría.

Nesta nova obra, As Fillas Bravas usan as fontes do teatro clásico grego e da música tradicional galega como ferramentas para sensibilizar sobre o impacto do cambio climático na nosa forma de vida.

As Fillas Bravas é, por unha banda, unha obra na que tres mulleres maiores de aldea tratan de entender o cambio climático e facerlle fronte aplicando a sabedoría popular e a súa propia experiencia vital; e, por outro, é un espectáculo con perspectiva de xénero á procura de modelos de empoderamento feminino.

Por que o mito de Casandra? Casandra, filla do rei de Troia, era tan fermosa que Apolo ofreceulle o don da profecía se aceptaba converterse na súa amante. Ela aceptou. Pero cando Apolo se lle achegou, ela negouse. O deus, ofendido, pensa un castigo exemplar, sen deixar de cumprir a palabra dada: concédelle a Casandra o don de predicir o futuro, co engadido dunha maldición incontestable, ninguén vai crer o que ela di.

Por que a ciencia é a Casandra actual e o cambio climático o noso cabalo de Troia? Na actualidade, a maldición de Casandra materialízase nas persoas que se dedican á investigación científica. A ciencia trata de comprender, respectar e actuar segundo as leis do universo. Busca a verdade sobre o funcionamento da natureza e adianta, mediante modelos conceptuais ou numéricos, as consecuencias da actuación humana. Mais poucas veces se lle fai caso e a comunidade científica ve como a sociedade camiña irremediablemente cara a un desenlace que se podería evitar. Un exemplo perfecto disto é o cambio climático, do que a comunidade científica de todo o mundo leva alertando como mínimo desde os anos setenta, sen que ninguén lle conceda a credibilidade que merece.

Intérpretes: Patricia de Lorenzo, Mónica García e Arantza Villar

Autor: Chévere

Dirección e adaptación: Xron

Escenografía e vestiario: Chévere

Deseño e son: Xacobe Martínez Antelo

Deseño de iluminación: Fidel Vázquez

Música: Popular

Idioma: galego

VENDA DE LOCALIDADES

• Venda en liña: Ataquilla.com
• Venda no despacho de billetes do Fórum unicamente os días de función desde unha hora antes (sempre que queden localidades dispoñibles)
• Venda no despacho de billetes central da praza de Ourense: de luns a venres de 11:00 h a 15:00 h e de 16:30 a 19:30 h (excepto festivos)