28 de octubre de 2021
A exposición de ‘Emilia Pardo Bazán. O reto da modernidade’, estará no Kiosko Alfonso ata o 18 de decembro
Inés Rey:“Pardo Bazán foi unha figura clave da literatura española e da cidade da Coruña, que debe ser recoñecida e coñecida de xeración en xeración”
A Coruña acolle desde hoxe a exposición 'Emilia Pardo Bazán. O reto da modernidade', dentro dos actos organizados na cidade polo 100 aniversario do pasamento da célebre escritora. Esta tarde tivo lugar no Kiosco Alfonso a inauguración oficial desta mostra organizada pola Biblioteca Nacional de España e que contou coa colaboración do Concello da Coruña e da Xunta de Galicia.
A alcaldesa Inés Rey enxalzou a figura de Pardo Bazán: "Estamos hoxe aquí para honrar a unha das mulleres de referencia da cidade da Coruña. Unha cidade que non se entendería sen a achega de grandes mulleres como Doña Emilia, María Pita, Teresa Herrera, Concepción Arenal, María Barbeito ou Rosalía de Castro. Mulleres con maiúscula, adiantadas ao seu tempo que contribuíron a construír A Coruña aberta e vangardista da que desfrutamos hoxe".
Na inauguración na que participou o presidente da Xunta, Alberto Núñez Feijoo, a directora da Biblioteca Nacional, Ana Santos Aramburo e a comisaria da exposición, Isabel Burdiel a alcadesa subliñou que "a posibilidade de contar con esta magnífica exposición na nosa cidade permítenos achegar a todos os coruñeses e coruñesas, galegos, galegas e visitantes a incrible capacidade creativa desta intelectual, mais tamén coñecer de preto á muller única e adiantada ao seu tempo que foi Pardo Bazán".
A mostra comisariada por Isabel Burdiel afonda na vida literaria e privada la escritora coruñesa a través de diferentes etapas. O espazo expositivo divídese no Kiosco Alfonso en catro capítulos e un epílogo, comezando cos seus primeiros anos e a construción da súa figura, seguindo coa súa consagración, pasando por cuestións cume da súa carreira como o feminismo, o amor ou Meirás e rematando cos seus últimos anos e a súa pegada na literatura posterior.
En total, hai unhas duascentas pezas procedentes tanto da BNE como de outras institucións como a Real Academia Galega. Inclúense libros impresos, manuscritos, gravados, fotografías e outros documentos relacionados coa escritora coruñesa. A mostra instálase no Kiosco Alfonso tras o seu paso pola Biblioteca Nacional de España e permanecerá na cidade ata o 18 de decembro, con entrada gratuíta e libre ata completar aforo.
"Desde o Concello da Coruña quixemos visibilizar ao longo de todo este ano as múltiples facetas desta incrible escritora honrando a súa memoria con medio centenar de actos. Unha figura clave da literatura española e da cidade da Coruña, que debe ser recoñecida e coñecida de xeración en xeración", sinalou Inés Rey durante o acto de inauguración, que forma parte do programa EPB100. A alcaldesa calificou esta mostra como "un dos acontecementos culturais do ano na Coruña".
A exposición aborda o carácter multifacético de Emilia Pardo Bazán, que tivo unha dimensión europea e transnacional. "Dona Emilia foi unha sensacional novelista, a mellor do século XIX. Mais tamén foi unha gran xornalista, ensaísta, crítica literaria, poetisa, dramaturga, tradutora e, sobre todo, precursora do feminismo e dos dereitos das mulleres", afirmou Inés Rey.
A mostra explicará o importante papel de Pardo Bazán na renovación da literatura española do século XIX, así como as súas achegas a outros xéneros e oficios. Tamén afondará na súa idea de feminismo e como introduciu este termo no debate cultural e político da época. En definitiva, a exposición buscará achegar aos coruñeses á Pardo Bazán escritora, pero tamén a súa faceta máis privada.
Esta mostra e o resto de actos organizados polo Concello no centenario do pasamento de Emilia Pardo Bazán amosan o compromiso do goberno local coa cultura e coa figura dunha das súas veciñas más singulares. Inés Rey lembrou no acto de inauguración que nuns días colocarase de novo nos xardíns de Méndez Núñez a estatua orixinal de Pardo Bazán como culminación dos numerosos actos organizados este 2021.
18 de abril de 2024
13 de abril de 2024
11 de abril de 2024
Lo sentimos pero tu navegador es muy antiguo para poder mostrar esta página. Debes de actualizarlo o usar un navegador compatible. Hemos optimizado esta web para Google Chrome, Mozilla Firefox, Opera, Safari y Microsoft Edge. Instalar ahora un navegador compatible