O alcalde da Coruña, Xulio Ferreiro, participou este venres na Asemblea xeral ordinaria do Eixo Atlántico, entidade da que forma parte o Concello e que se centra na colaboración e promoción dos municipios da denominada Eurorrexión Galicia-Norte de Portugal. Na xuntanza, que tivo lugar na cidade portuguesa de Maia, en Portugal, o organismo deu o visto e prace ao programa e orzamento anual do ente, que ascende a 4.652.722 euros, e procedeu á elección da nova Comisión Executiva, que foi reelixida por unanimidade, e na que o alcalde coruñés seguirá a ocupar o cargo de vogal. Tal e como destacou Ferreiro, "é unha boa nova que A Coruña conte cun papel estratéxico e reforce a súa presenza no Eixo". "O goberno local cree firmemente na cooperación e na colaboración entre municipios como ferramenta para avanzar na implementación de políticas transformadoras. Hoxe referendamos o noso compromiso por traballar, en común, no impulso de Galicia e do Norte de Portugal", sinalou. O rexedor tamén salientou o papel da cidade "como referente" no marco do ente transfronteirizo, ao acoller o vindeiro mes de marzo o acto de lanzamento do plan de acción co que se materializará a Axenda Urbana do Eixo Atlántico e que contará coa participación de representantes políticos e expertos e expertas en políticas urbanas de Galicia, Portugal, España e a Unión Europea.

Entre os principais acordos acadados esta mañá, sitúanse a aprobación dun segundo paquete de infraestruturas que complemente a liña do Minho, xa en obras ou en proceso de contratación con prazo de finalización contra o último trimestre de 2019, e as conexións pendentes na parte galega. A este respecto, o paquete prioriza a conexión Ferrol - A Coruña, a máis atrasada e con peores perspectivas de todo o eixo atlántico ferroviario, e as conexións ferroviarias dos portos, como eixos principais en Galicia que complementen a saída sur de Vigo, Ourense-Lugo e Monforte-Palencia, sobre os cales a entidade transfronteiriza xa está a traballar, con ambos ministerios, desde hai máis dun ano.

A Asemblea, que se pechou cunha intervención do ministro de Medio Ambiente portugués, Joao Pedro Matos Fernandes, tamén acordou, a través da aprobación do programa anual, impulsar a política de cohesión no ámbito europeo a través da Rede C4C da que forma parte a entidade; a adecuación e mellora do Camiño Portugués de Santiago e unha acción concertada co Goberno para loitar contra os incendios; ou promover, a través da Rede Ibérica de Entidades Transfronteirizas (RIET), a elaboración dun novo tratado de cooperación bilateral entre España e Portugal que constitúa un novo marco xuríco para impulsar a cooperación.