A Coruña será xunto con Barcelona e Málaga unha das cidades escollidas para a celebración dos eventos conmemorativos do 50 aniversario da morte de Picasso. Así se decidiu esta tarde na constitución do pleno da Comisión Nacional para a conmemoración do 50 Aniversario da morte de Pablo Picasso da que forma parte a alcaldesa da cidade, Inés Rey. O acto de constitución da comisión tivo lugar en Madrid e estivo presidido polo presidente do Goberno Pedro Sánchez. Ao mesmo asistiron tres ministros (Miquel Iceta, José Alonso Bolaños e Manuel Albores), e a exministra Carmen Calvo ademais das alcaldesas de A Coruña e Barcelona e do alcalde de Málaga, entre outros.

Rey amosou a súa satisfacción pola elección da Coruña como sede de parte dos eventos que se celebrarán entre 2022 e 2023. "É unha moi boa nova xa que nos recoñece e sitúa no mapa das cidades picassianas, o que nos abrirá enormes oportunidades culturais, económicas e turísticas".

Na programación aprobada hoxe inclúese a celebración na cidade dunha exposición internacional no primeiro semestre do 2023, "Picasso, blanco en el recuerdo azul, A Coruña 2023", que relacionará as principais etapas da produción do artista con obras do seu período formativo na cidade.

Esta será unha das diferentes actividades que se desenvolverán na Coruña e que se darán a coñecer nos próximos meses.

O Concello da Coruña vén traballando desde hai máis dun ano para que a cidade ocupe un lugar central dentro do programa de actividades que se desenvolverán con motivo do aniversario, traballo levado ao cabo dende o convencemento e o compromiso da alcaldesa de amosar a capacidade da Coruña para organizar e acoller eventos de relevancia internacional.