Andainas guiadas | Programa mensual 

Opción 1: Ruta polo deporte coruñés e 50 anos do Palacio dos Deportes de Riazor

Horario: 12.00 a 13.00 horas

Duración estimada: 1 hora

Datas: todos os venres de cada mes, excepto festivos

Temática: Historia do deporte coruñés

Nesta ruta repasarase a historia do deporte na cidade da Coruña e as súas persoas protagonistas xunto aos escenarios en que destacaron. Lembraranse fitos como os que ocorreron no Corralón da Gaiteira e A Granxa ata os do campo de Riazor e o estadio que se constrúe a comezos dos 40, unha arquitectura que se revisará para acoller o Mundial de 1982 e que finalmente nos 90 recibirá o "fenómeno do Superdepor". Ademais do fútbol, abordaranse outros deportes como o hóckey sobre patíns, o fútbol-sala, o baloncesto, o atletismo, o remo e a esgrima, así como as e os coruñeses/as que foron "olímpicas/os".

Punto de saída: busto de Arsenio Iglesias

Percorrido: a ruta comezará no busto de Arsenio Iglesias do paseo de Riazor e transitará polos exteriores e interiores do Estadio municipal Abanca Riazor e o Palacio Municipal de Deportes, onde está instalada a exposición "50 anos do Palacio Municipal".

Punto de finalización: Palacio dos Deportes de Riazor.

Opción 2: Ruta polo parque escultórico da Torre

Horario: 12.00 a 13.30 horas

Duración estimada: 1,5 horas

Distancia aproximada: 2,7 quilómetros

Datas: todos os domingos de cada mes

Temática: Historia mitolóxica do contorno

A ruta supoñerá unha camiñada polo parque escultórico que rodea a Torre de Hércules, gozando da paisaxe atlántica e a mitoloxía que encerran as estatuas situadas nas 47 hectáreas de pulmón verde que rodean o faro.

Punto de saída: Oficina de Información da Torre de Hércules

Percorrido: realizaranse paradas na escultura de Caronte, nos Menhires, no Campo da Rata e diante das obras de Hércules na nave dos argonautas, Ara Solis, do petróglifo e as de Breogán, Rosa dos Ventos e do grupo escultórico Ártabros.

Punto de finalización: Grupo escultórico Ártabros

INSCRICIÓN E NORMAS DE PARTICIPACIÓN

A quen vai dirixido? Este programa está dirixido inicialmente ao alumnado das Escolas Deportivas Municipais maior de idade. No caso de que queden prazas libres, abrirase a toda a cidadanía maior de idade.

Canto custa a actividade? A actividade é gratuíta.

Como me apunto? Cubrindo o formulario ou chamando ao teléfono 981 189 800.

                 Preme aquí para acceder ao formulario

Que datos necesito? Nome e apelidos, número de DNI, número de teléfono, a EDM á que asistes no curso 2020-2021. (No caso das EDM da piscina de Riazor, indicarase a EDM no curso 2019-2020). 

Cando me podo apuntar? Ábrese un prazo para as rutas de cada mes.

Como sei que podo participar na andaina? As listaxes de persoas admitidas e en lista de espera publícanse nesta mesma páxina. Ademais, a/o guía ponse en contacto coas persoas admitidas uns días antes de cada ruta.

Como se organizan os grupos? Debido á normativa vixente en materia sanitaria, os grupos serán de 6 persoas máis a/o guía ata que a situación derivada da pandemia por COVID-19 permita aumentar o número de prazas.

Normas de participación: será obrigatorio usar máscara durante toda a actividade, así como respectar as distancias de seguridade co resto de persoas participantes. Atenderanse en todo momento as indicacións da/o guía.

Ao finalizar cada andaina, as e os participantes poderán repoñer forzas coa degustación que ofrecerá Sanbrandán.