Esta tarde, na presentación da II Semana do Cinema Galego que tivo lugar no Teatro Colón, a alcaldesa, Inés Rey, manifestou o seu compromiso co sector audiovisual galego: "A Coruña ten que volver ser unha cidade de cinema". De feito, destacou, "a intención do Goberno local é que o cine galego teña aínda máis presenza o ano que vén". A rexedora anunciou que desde o consistorio xa se está a traballar "para celebrarmos unha III Semana do Cinema Galego de maior duración, con diversidade de categorías e que constitúa un punto de encontro profesional e, por suposto, un referente nacional".

No acto de presentación, que tamén foi retransmitido por streaming a través das redes sociais da Academia Galega do Audiovisual, tamén participaron a presidenta desta entidade, Ana Míguez, e o deputado de Cultura, Xurxo Couto.

A alcaldesa afirmou que "apoia firmemente a Semana do Cinema Galego para darlle visibilidade á gran cantidade de producións galegas e axudar o sector audiovisual galego na súa proxección". Rey lembrou a acollida que a iniciativa tivo o ano pasado: "Todos os días houbo un cheo absoluto e colas de xente que quería entrar". Rey tamén apelou ao sector da cultura manifestando que o Goberno local "aposta por protexer e darlles cobertura aos elementos artísticos de maior proximidade" porque "a pandemia lembrounos o fundamental que supón poñer en valor o propio, o próximo", dixo. Nesa aposta por programar cultura segura, a rexedora afirmou que "este ano, con todas as restricións, quixemos estar, da maneira que for posible, para dicirlle á nosa escena audiovisual que estamos aí, que apostamos e cremos no cinema que se fai en Galicia".

No acto de hoxe, e despois da presentación deste ciclo de cinema, tivo lugar un coloquio entre as actrices María Mera, Nerea Barros e Victoria Teijeiro, así como a proxección de "A Illa das mentiras", de Paula Cons, a primeira das catro películas finalistas dos Premios Mestre Mateo deste ano na categoría de longametraxe que se proxectarán desde hoxe e até o 28 de marzo no Teatro Colón. As localidades para todas as sesións da Semana do Cinema Galego, 164 por proxección, están esgotadas desde hai días.