27 de maio de 2022
A Fundación Luis Seoane cumpre deste xeito co acordo establecido en abril de 2021 polo seu padroado para inventariar a totalidade da obra do artista galego
Este venres, o padroado da Fundación Luis Seoane acordou en xunta ordinaria os nomes dos dez especialistas encargados de abordar a tarefa de analizar e evaluar a obra realizada por Luis Seoane (Bos Aires, 1910 - A Coruña, 1979), unha das figuras fundamentais da arte e a cultura galegas do século XX. Catro décadas de produción artística que o creador galego envorcou en óleos, gravados, álbumes, debuxos, deseño gráfico e editorial, da que a fundación que leva o seu nome posúe a colección máis importante.
A obra de Luis Seoane está presente ademais en numerosas coleccións públicas e privadas. O propósito desta comisión é recompilar os traballos realizados polo artista, independentemente da súa localización, co obxectivo de identificalos, elaborar as fichas correspondentes e poñelos a disposición do público a través dunha publicación. Para isto, a Fundación Luis Seoane proporcionará aos membros desta comisión, que se reunirá un mínimo de tres veces ao ano, un listado das obras de Seoane recompiladas ata o momento pola institución xunto cos datos proporcionados por coleccionistas, institucións, particulares, etc., para o seu estudo.
A comisión estará integrada por María Antonia Pérez Rodríguez, Profesora Titular na Facultade de Humanidades e Documentación da Universidade da Coruña e investigadora especializada na obra de Luis Seoane; Ángeles Penas Truque, directora do Museo de Belas Artes da Coruña, institución que posúe unha importante colección de obra de Luis Seoane cedida pola súa viúva; Carlos López Bernárdez, crítico de arte e comisario de numerosas exposicións dedicadas a artistas galegos, entre eles Luis Seoane; Rosa Espiñeira Pan, experta sobre a obra de Luis Seoane e albacea testamentaria de María Elvira Fernández López, viúva do artista e Víctor Manuel Rodeiro, galerista especializado en Vangardas Históricas galegas. Pola súa parte, a Fundación Luis Seoane participará na comisión con tres membros: Xosé Díaz Arias de Castro, vicepresidente; Silvia Longueira Castro, directora da entidade, e Carmela Montero García, conservadora e documentalista. A estes nomes engadirase ademais un representante da Real Academia Galega de Belas Artes de Nosa Señora do Rosario.
19 de abril de 2024
19 de abril de 2024
19 de abril de 2024
Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible