22 de xaneiro de 2023
Infraestruturas está a substituír os antigos colectores por uns novos, cun diámetro exterior que reforza a seguridade fronte a posibles fugas
O Concello da Coruña, a través do servizo municipal de Infraestruturas, iniciou esta semana os traballos para renovar a rede de saneamento entre as rúas Cardenal Cisneros e González del Villar, no barrio da Sagrada Familia.
As obras comezaron o luns, coa previsión de que estean rematadas na primeira semana de febreiro. Neste sentido, o Concello está a acometer a substitución dos colectores, feitos con base de gres e con 200 mm de diámetro exterior, por uns novos, de PVC e cun diámetro máis amplo, de 315 mm.
A intervención está centrada, moi específicamente, no sector central de Cardenal Cisneros que conflúe coas rúas Sagrada Familia, San Lucas e González del Villar, nun tramo de case un centenar de metros no que os colectores asociados á rede eran xa antigos.
As intervencións para mellorar o saneamento nos barrios da cidade
Esta intervención na Sagrada Familia dá continuidade ao plan de melloras do saneamento que está a executar o Goberno de Inés Rey nos barrios da cidade, sempre baixo os parámetros indicados previamente, renovando o material dos colectores e apostando por un diámetro exterior que reforce a seguridade fronte a posibles fugas.
Ademais das intervencións en Cardenal Cisneros, o persoal de Infraestruturas traballa actualmente para remodelar a rede de saneamento no núcleo poboacional de Bens, na rúa Marsella (A Zapateira) e tamén se están a subsanar deficiencias existentes nos colectores próximos ao cruzamento entre Ramón y Cajal e a avenida do Exército.
Xa se executaron a mediados de decembro do ano pasado intervencións de mellora na rede de saneamento das rúas José Cornide, no Ensanche; Médico Devesa Núñez, en Lonzas, e Albert Camus, situada no barrio de Monte Alto, na contorna da Domus e o Paseo Marítimo.
Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible