As empresas de telefonía móbil que operan no termo municipal da Coruña terán que aboar unha taxa pola ocupación do solo público coas súas instalacións. O Concello regula a través das súas ordenanzas a ocupación do solo público por parte de empresas privadas, mais até agora as compañías de telefonía móbil estaban exentas ao non existir un regulamento propio.

Dentro das medidas progresistas de xustiza fiscal promovidas pola alcaldesa, Inés Rey, figura a creación da nova ordenanza, que nos vindeiros días se someterá a un período de exposición pública de 20 días e que entrará en vigor no 2022.

A nova ordenanza é froito do proceso de diálogo aberto coa Marea Atlántica, grupo co que se están a estudar novas medidas de xustiza tributaria para aplicar o ano que vén, indicou o concelleiro de Economía, Facenda e Réxime Interior, José Manuel Lage Tuñas.

As compañías pagarán unha taxa básica de 16,63 euros por metro cadrado de espazo público ocupado, cunha fórmula que ten tamén en conta o número de liñas de cada compañía e outras variables técnicas. En total, indicou Lage Tuñas, os servizos tributarios do Concello estiman que os ingresos anuais pola nova ordenanza achegaranse aos 1,5 millóns de euros.

"O Goberno de Inés Rey traballa nunha redistribución máis xusta da carga fiscal -explicou Lage Tuñas- equiparando as empresas de telefonía móbil co resto de compañías que xa pagan por usar o solo público".

A taxa, que tamén se aplica noutras grandes cidades, permitirá aumentar os ingresos municipais para ofrecer máis e mellores servizos públicos. A nova ordenanza súmase á listaxe de melloras levadas a cabo por Inés Rey desde a súa chegada ao Goberno, melloras que supuxeron unha minoración da taxa de plusvalías para as rendas máis baixas e exencións e reducións por lixo, auga e saneamento por causa da pandemia, entre outras medidas de xustiza fiscal.