A Xunta de Goberno Local aprobou este mércores a licitación do novo Servizo de Axuda a Domicilio (SAD), un servizo que permite a atención directa á cidadanía en situación de dependencia recoñecida e que conta con 1.200 persoas usuarias no termo municipal.

O novo contrato do Servizo de Axuda a Domicilio contará cun orzamento superior aos 30 millóns de euros con vistas ao trienio 2023-25: 9,3 millóns, correspondentes ao ano 2023; e 10,5 millóns para cada unha das anualidades correspondentes aos anos 2024 e 2025. "É un contrato esencial para reforzar os servizos sociais da cidade, concibido baixo unha premisa fundamental: garantir un servizo máis eficiente ás persoas usuarias e as súas familias, e dar as mellores condicións posibles ás 400 auxiliares que traballan ao seu lado", subliñou hoxe a alcaldesa, Inés Rey.

A principal novidade do novo Servizo de Axuda a Domicilio é a distribución da cidade en cinco zonas de atención diferenciadas, un formato ideado para reforzar o concepto de proximidade, facilitar as substitucións puntuais e tamén o apoio entre auxiliares ante situacións imprevistas. Neste sentido, abriranse tamén cinco oficinas de coordinación e atención ás familias en cada unha das cinco áreas territoriais, co obxectivo de dar solucións inmediatas e facilitar a comunicación coas persoas usuarias do SAD.

En paralelo, promoverase un SAD sociosanitario para a atención urxente a persoas, con vistas a prestar servizo, por exemplo, ás que veñen de pasar por unha intervención cirúrxica e precisan axuda no fogar.

Ademais, e froito da colaboración entre o Concello, as persoas coidadoras e os sindicatos, o novo contrato contempla a prestación simultánea do servizo por dous auxiliares, nos casos no que a situación da persoa usuaria así o requira, garantindo unha atención adecuada ás súas circunstancias e tamén un alivio da carga de traballo para o coidador ou coidadora.

Este novo contrato tamén inclúe un lote específico destinado a garantir a inspección e control de calidade do Servizo de Axuda a Domicilio, para resolver de forma áxil e eficaz todo tipo de incidencias que puidesen xurdir. "Executamos así unha fonda reestruturación do servizo, que ten como principal fin ofrecer un mellor servizo aos usuarios e usuarias e  mellores condicións para as traballadoras", subliñou Inés Rey.

Sistema de climatización da Fundación Luís Seoane

Por outra banda, o Goberno municipal tamén deu luz verde este mércores á primeira fase do proxecto para a reparación e reposición do sistema de climatización da Fundación Luís Seoane. Dito proxecto sairá a licitación no primeiro trimestre do vindeiro ano cun orzamento base de 795.000 euros.

O sistema de climatización da Fundación Luís Seoane data do ano 2002, e nesta primeira fase do proxecto acometeranse as intervencións máis urxentes, co obxectivo de arranxar as deficiencias existentes. Substituiranse as bombas de calor existentes, tamén as tubaxes e circuítos hidráulicos, levarase a cabo unha impermeabilización da cuberta e adecuarase todo o sistema de climatización da Fundación Luís Seoane á normativa vixente, garantindo unha mellora integral no acondicionamento térmico do edificio, apostando por facelo máis eficiente en termos enerxéticos.

Desta forma, e baseándose no compromiso asumido polo executivo municipal no último padroado da Fundación, no mes de maio, "este Goberno dá un paso fundamental para protexer a memoria e legado de Luís Seoane na Fundación, onde se conserva o seu arquivo epistolar e documental", apuntou Inés Rey.

Licenzas urbanísticas

A Xunta de Goberno Local, explicou a alcaldesa, autorizou a concesión dunha licenza urbanística a Repsol, con vistas á instalación dun novo intercambiador na unidade 677 da refinaría de Bens, un proxecto que conta cun orzamento de 1,4 millóns de euros e orientado á recuperación de calor e á redución de emisións de CO2.

Ademais, tamén aprobouse tamén a tramitación de licenza para autorizar a "Hijos de Rivera" a construción dunha nova nave de almacenaxe na rúa Gutemberg, no polígono de Agrela. O proxecto para construír esta nave, dotado con 1,9 millóns de euros, permitirá ampliar as instalacións de "Estrella Galicia" na cidade.

Por outra banda, a Xunta de Goberno Local concedeu licenza a Naturgy para acometer a desmantelamento do parque de transferencia de carbón na instalación da Medusa, no peirao do Centenario. Neste sentido, o Concello solicitou un informe técnico de viabilidade económica para valorar a opción de trasladar a Medusa a outro lugar, mais este estudo certificou a inviabilidade do plan. "Trasladar a Medusa sairía máis caro que erixir un recinto novo. Si compartimos o valor desta construción, e pedirémoslle á Autoridade Portuaria que si así o considera conserve, desmontada, a estrutura metálica, para darlle un novo uso no futuro se resultase viable", concretou a alcaldesa.

Bolsas Canadá 2023-24

Este mércores aprobouse a licitación do contrato para a vindeira edición das Bolsas Canadá, que permitirán a rapazas e rapaces dos centros educativos da cidade gozar dunha estadía académica dun ano en Norteamérica para cursar o primeiro ano de Bacharelato. Será entre os meses de agosto de 2023 e 2024.

Nesta edición 2023-24, o Concello financiará as Bolsas Canadá con 650.000 euros.

Outros asuntos aprobados

O Goberno municipal tamén deu luz verde á dotación de 156.000 euros en axudas para desprazamentos en taxi, a través do programa Bono Taxi, e con vistas ao exercicio 2023. 

Aprobouse tamén a concesión dunha subvención nominativa, de 100.000 euros, destinada ao Club Básquet Coruña, co obxectivo de apoiar a entidade no fomento de actividades deportivas e saudables vencelladas ao baloncesto.