Xa está dispoñible na web municipal a listaxe coa proposta de resolución provisional das subvencións destinadas a entidades veciñais que concede o Concello da Coruña a través da Concellería de Participación Cidadá. O importe total das axudas suma 60.000 euros, que 22 asociacións da cidade poderán utilizar para gastos de funcionamento e para dinamizar os seus proxectos e actividades nos barrios durante o ano 2022. As axudas enmárcanse dentro dos plans de impulso ás entidades locais posto en marcha polo Goberno de Inés Rey.

A finalidade das subvencións é apoiar economicamente os gastos de funcionamento e a realización de programas, proxectos e actividades de interese cívico, social ou cultural das asociacións veciñais no Concello da Coruña, xa realizados ou por realizar, durante o exercicio económico do ano 2022, de acordo con criterios obxectivos que ponderen a importancia e representatividade de cada unha delas.

As solicitudes recibidas para ambas as convocatorias foron valoradas e puntuadas pola Mesa de Avaliación, que emitiu informe e que posteriormente o órgano instrutor formulou a proposta de resolución provisional para as dúas liñas de subvención contidas na convocatoria deste ano. 

A partir da data de publicación, todas as asociacións propostas como beneficiarias teñen un prazo de 10 días para presentar alegacións, non caso de que así o estimen oportuno.