O Concello executará este 2022 as 22 propostas gañadoras dos Orzamentos Participativos 2021. A aprobación no pleno extraordinario deste xoves dos Orzamentos Municipais do 2022 grazas ao acordo alcanzado entre o Goberno municipal e a Marea Atlántica, permitirá acometer ditos proxectos, que contemplan a ampliación de zonas verdes, a mellora de parques infantís e superficies deportivas ou a creación de novos carrís bici.

O Goberno de Inés Rey destinará máis de 2,5 millóns de euros dos orzamentos ás propostas realizadas polos coruñeses e as coruñesas que foron as máis votadas. Refórzase deste xeito o compromiso municipal coas achegas e as necesidades da cidadanía, que puido presentar e votar propostas para o conxunto da cidade e para cada un dos dez distritos que a compoñen.

Os coruñeses e as coruñesas apostaron nestes Orzamentos Participativos maioritariamente pola ampliación de zonas verdes, melloras en parques infantís e en superficies deportivas e ampliación das plataformas de mobilidade alternativa ao coche. Trátase de propostas que seguen a liña política da alcaldesa Inés Rey, buscando unha cidade para as persoas e comprometida con formas de mobilidade sostibles e espazos máis amables.

Os Orzamentos Participativos 2021 foron os que máis propostas recibiron desde que se realizan. Os cidadáns e cidadás puideron escoller proxectos para aplicar no ámbito de toda a cidade por valor dun millón de euros. Ademais, escolléronse tamén proxectos por valor de 150.000 euros para cada un dos 10 distritos da cidade, con dous proxectos a maiores para aproveitar os remanentes orzamentarios. Ademais, foi a primeira edición que incorporou a votación presencial, o que permitiu rachar a fenda dixital e que toda a cidadanía tivese acceso ás propostas.

Propostas gañadoras dos Orzamentos Participativos 2021

Proposta

Custo

Toda a cidade
Colocación de máis árbores, plantas e flores en toda a cidade	250.000 euros
Creación de parques infantís cubertos	250.000 euros
Aseos autolavables no Paseo Marítimo	250.000 euros
Parques infantís adaptados para nenos e nenas con mobilidade reducida en cinco lugares	250.000 euros

Distrito 1
Conectar os carrís bici do Paseo Marítimo e o Cantón Pequeno	150.000 euros

Distrito 2
Plantar árbores na rúa da Torre	35.000 euros
Humanización da avenida de Hércules	60.000 euros

Distrito 3
Cobertura parcial do patio do CEIP Labaca	75.000 euros
Acondicionamento de baños no CEIP Labaca	60.000 euros

Distrito 4
Reforma ou ampliación do parque infantil da Sardiñeira	100.000 euros
Carril bici no cruzamento da Avenida de Arteixo coa rolda de Nelle	150.000 euros

Distrito 5
Creación de instalacións deportivas no barrio dos Rosales	75.000 euros
Zonas verdes no aparcadoiro de Riazor	50.000 euros

Distrito 6
Novas zonas verdes na Agra do Orzán	150.000 euros

Distrito 7
Mellora de accesibilidade das escaleiras do CEIP María Pita	150.000 euros

Distrito 8
Reforma exterior da escola infantil Os Cativos	90.000 euros

Distrito 9
Zona polideportiva descuberta na Urbanización Breogán	75.000 euros
Carril bici en Novo Mesoiro	150.000 euros
Paso ciclista no carril bici entre Mesoiro e a Universidade	48.400 euros

Distrito 10
Paso de peóns na avenida de Arteixo	85.000 euros
Construción de pista Pumptrack	53.600 euros
Iluminación da pista polideportiva de Alcalde Salorio Suárez	7.900 euros

Total

2.564.900 euros