O Concello da Coruña finalizou os traballos de reurbanización da travesía da Torre, no barrio de Monte Alto. O obxectivo desta actuación é garantir a accesibilidade universal dos seus percorridos peonís a través da humanización da contorna.

O proxecto incluíu a reordenación deste ámbito coa disposición dunha plataforma única que diferencia as zonas para peóns e peoas e de tráfico rodado con distintos firmes. Ademais, plantáronse 14 árbores, dentro da estratexia do Goberno de Inés Rey de expansión de zonas verdes e arboredo nos espazos urbanos.

A intervención na travesía prolóngase ata as conexións das rúas Tren e Disciplina, onde se reformaron os cruzamentos para aumentar os espazos peonís e evitar o estacionamento indebido que se realiza neses puntos. Ademais, a disposición de arboredo tamén chegou ás interseccións da travesía da Torre coas rúas Tren, Disciplina e Xustiza.

Mellora nas zonas verdes

En paralelo a esta actuación na travesía da Torre, o Goberno municipal de Inés Rey tamén finalizou os traballos de mellora na praza de Cántigas da Terra, tamén no barrio de Monte Alto, onde se mellorou a xardinería. Tamén se renovaron as zonas verdes das rúas Nosa Señora do Rosario e Faro.