Este luns abriuse á circulación un novo paso peonil elevado na avenida de Arteixo, situado á altura do cruzamento coa rúa Enciclopedia Francesa. Desta forma, o Concello avanza no seu plan para mellorar as conexións peonís entre o barrio dos Mallos e o parque de Vioño.

A intervención, promovida pola Área de Economía e Planificación Urbana, dá resposta a unha demanda veciñal. As obras comezaron a finais de xullo, e implicaron a renovación xeral do pavimento e os accesos á beirarrúa, así como a elevación da vía de circulación rodada co obxectivo de dar forma ao novo paso peonil e, así, contribuír ao calmado do tráfico nun enclave onde o tránsito de vehículos é habitual.

Ademais, remodelouse un pequeno treito da medianeira vexetal que separa ambos os sentidos de circulación da avenida de Arteixo -sen afectar ao arboredo existente-, para crear unha illa con pendente accesible na intersección central do paso peonil.

Neste sentido, tanto nos accesos ao paso peonil -nivelado á escala da beirarrúa- como na intersección central tamén se dispuxo un pavimento diferenciado con lousas podotáctiles, unha superficie en relevo que facilita a orientación das persoas invidentes.

O novo paso peonil habilitouse este luns tras completarse os traballos de regulación semafórica executados desde o Centro Integral de Mobilidade (CiMob), coa activación dos novos báculos instalados no cruzamento.