O Concello da Coruña, a través da súa Concellaría de Mercados, organiza este venres 25 e sábado 26 de novembro unha acción de dinamización comercial na contorna do mercado de Ramón Cabanillas, no barrio dos Mallos. Esta iniciativa do Goberno de Inés Rey busca fomentar o consumo local e de proximidade. A acción farase despois de consultalo coas persoas responsables dos postos deste espazo municipal.

As diferentes accións levaranse a cabo no propio mercado e nas zonas limítrofes este venres, en horario de 11.00 a 13.30 e de 17.30 a 20.00 horas, e o sábado, en horario de 11.00 a 13.30 horas. Contarase cun actor e unha actriz profesionais con ampla experiencia en espectáculos circenses, que apoiarán a súa actuación con distintos elementos.

Durante as dúas xornadas repartiranse 150 boletos que conteñen un total de cinco premios de 50 euros para gastar no mercado de Ramón Cabanillas. As persoas interesadas poderán participar respondendo correctamente a tres preguntas, facéndose unha foto e subíndoa ás súas redes sociais ou deixando unha mensaxe nun cartel que portarán os actores da campaña.