Este mércores, a Xunta de Goberno Local aprobou a sinatura dun convenio coa Asociación Pro Enfermos Mentales da Coruña (APEM), que, a través da Fundación Emalcsa, permitirá a recuperación dos emblemáticos Cabaliños de Méndez Núñez para a posta en marcha dun proxecto de integración laboral de persoas con diversidade funcional.

Os cabaliños dos xardíns, unha das atraccións máis simbólicas da cidade, estiveron en funcionamento entre os anos 1969 e 2002. "Este Goberno municipal, coa colaboración da familia propietaria dos Cabaliños, aposta por volver a poñer en marcha aquel servizo, impulsando o potencial turístico da cidade e sumando un novo motor para a inclusión laboral na Coruña", explicou Inés Rey, que trasladou o seu agradecemento aos propietarios dos Cabaliños por contribuír á volta desta atracción clásica da paisaxe coruñesa.

Persoal usuario de APEM será o encargado de xestionar o servizo dos cabaliños, que xa estarán operativos nestas festas de Nadal. Nos vindeiros días, o Concello ofrecerá toda a información con respecto aos días e horarios de operatividade.