Os IES Ramón Otero Pedrayo da Coruña e o IES A Pinguela de Monforte de Lemos visitarán o mercado de Eusebio da Guarda os días 19 e 20 de febreiro, respectivamente, co programa da Consellería do Mar "O sabor da aventura está no mar".

Durante a visita, o alumnado visualizará a variedade de peixes e mariscos que se poñen a disposición das persoas consumidoras no mercado da praza de Lugo, a etiqueta dos produtos e os aspectos que determinan a súa frescura. Ademais, permitirá coñecer e poñer en valor as características do comercio de venda polo miúdo da Coruña e a actividade diaria dunha praza de abastos. Ao remate da visita, degustarán unha merenda mariñeira, co obxectivo de dar a coñecer os produtos do mar desde o punto de vista culinario.

O sabor da aventura está no mar

"O sabor da aventura está no mar" é un programa creado pola Consellería do Mar co dobre obxectivo de facilitar o coñecemento e consumo de produtos frescos do mar entre o alumnado galego e de incidir e equilibrar as súas dietas alimentarias. As súas persoas destinatarias son o colectivo de escolares de Educación Primaria e o seu profesorado.